काठमाडौं । गुल्मी जिल्लामा ट्राफिक नियम उल्लङ्घन बढ्दै गएपछि ट्राफिक प्रहरीले कारबाही कडाइ गरेको छ। चालु आर्थिक वर्ष २०८२/८३ को कात्तिक मसान्तसम्म विभिन्न किसिमका ९५१ सवारीसाधन कारबाहीमा परे । यसरी गरिएको कारबाहीबाट नौ लाख २८ हजार रुपैयाँ राजस्व सङ्कलन भएको जिल्ला ट्राफिक प्रहरी कार्यालय गुल्मीले जनाएको छ।
प्रहरी नायब निरीक्षक तथा ट्राफिक प्रमुख ज्ञानबहादुर कुँवरका अनुसार ट्रक, बस, कार, जिप, ट्याक्टर तथा मोटरसाइकलसहितका सवारीसाधन बढी कारबाहीमा परेका छन्। नियम उल्लङ्घन, तीव्र गति, अनुमति पत्रविनै सवारी चलाउने, मापसे गरी सवारी चलाउनेजस्ता कारण मुख्य हुन्। हालसम्म १९७ ट्रकबाट एक लाख ९८ हजार पाँच सय, १३ बसबाट १३ हजार, ३२८ कार/जिपबाट दुई लाख ८२ हजार पाँच सय रुपैयाँसहित अन्य सवारीसाधनबाट जरिवाना असुल गरिएको छ। चार महिनाको अवधिमा सवारी दुर्घटनाबाट पाँच पुरुषको मृत्यु भएको छ। एक पुरुष र एक महिला गम्भीर घाइते भएका छन् भने १४ महिला, २७ पुरुष र सात बालबालिका सामान्य घाइते भएका छन्।
दुर्घटना न्यूनीकरण अभियान
ट्राफिक प्रहरीले सवारी दुर्घटना नियन्त्रणका लागि सडकमै चालक, सहचालक र यात्रुलाई जनचेतनामूलक कार्यक्रम दिँदै आएको छ। साथै, चालक तथा सहचालकलाई ट्राफिक नियमसम्बन्धी प्रशिक्षण, स्वास्थ्य परीक्षण, विद्यालयस्तरमा सचेतना कार्यक्रम र नियमित सवारी जाँचको कडाइ गरिँदै आएको प्रहरी प्रमुख कुँवरले बताए। ट्राफिक प्रहरीको भनाइ अनुसार निरन्तर चेतनामूलक कार्यक्रम र कडाइका कारण सडक अनुशासन सुधार हुँदै गएको छ र आगामी दिनमा दुर्घटना थप घट्ने अपेक्षा गरिएको छ।
