काठमाडौं। दमक नगरपालिकाले नगरभित्र गाडिएका विद्युत पोलहरु र विद्युत ट्रान्स्फर राखेको वापतमा भाडा लिने निर्णय गरेको छ । दमक विद्युत प्राधिरकणले महसुल नतिरेको भन्दै दमकका सडक बत्तिहरु धमाधम काट्न थालेपछि नगरपालिकाले भाडा लिने निर्णय गरेको हो । नगरपालिकाको १३ औं नगरसभाले स्वीकृत गरेको दर रेटका आधारमा विद्युत प्राधिकरणबाट भाडा लिने निर्णय गरेको दमक नगरपालिकाले जनाएको छ । माघ ९ गते बसेको कार्यपालिका बैठकले यस्तो निर्णय गरेको दमक नगरपालिकाका प्रमुख रामकुमार थापाले जानकारी दिनुभयो ।
नगरपालिकाको नाममा जडान भएका १७० वटा विद्युत मिटरमा उठेको ६ करोड ९३ लाख ६१ हजार महसुल बक्यौता उठाउनका लागि विद्युत प्राधिकरण दमकले बारम्बार ताकेता गर्दै आएको छ । कतिपय ठाँउमा मिटरको लाइन काटेपछि टोल अन्धकार बनेपछि नगरपालिकाले यस विषयमा ध्यानकर्षण भएको बताउँदै आएको छ ।
विभिन्न टोल विकास संस्थाहरुको नाममा मिटर जडान भएका र नभएकाहरुको विल विद्युत प्राधिकरणले बक्यौता देखाएको हो । मिटर नजोडिएका ठाँउका विल धेरै देखाएर विद्युत प्राधिकरणले बढी रकम असुल्न खोजेको नगरपालिकाको दावी छ । यस विषयमा नगरसभामा पनि बारम्बार कुरा हुने गर्छ ।
नगर सभाले पास गरेको आर्थिक ऐन २०८० मा उल्लेख भए अनुसार मासिक रुपमा प्रतिपोल १ सय रुपियाँ, टेलिफोन पोल ५० रुपियाँ, ट्रान्सफरर्मर तथा टेलिफोन क्याविनेट १ हजार रुपियाँ र इन्टरनेट केवलको प्रति बक्स २५ रुपियाँ तोकिएको छ । अहिले इन्टरनेटको केवलको पैसा पनि विद्युत प्राधिरकणले नै लिँदै आएको छ । नगर कार्यपालिकाले विद्युत पोलको भाडा लिने निर्णय गरेपश्चात विद्युत पोलहरुको गणनाको तयारी भएको दमक नगरपालिकाका प्रमुख प्रशासकीय अधिकृत गणेशराज कार्कीले जनाउनुभयो । अहिले नै कतिवटा विद्युत पोलहरु छन् भन्ने यकिन भएको छैन र चाँडै याकिन गरिने उहाँको भनाइ छ ।