काठमाडौं, असोज २२ — सर्लाहीको गोडैता नगरपालिका–७ का वडाध्यक्ष विनेशकुमार दासलाई प्रहरीमाथि कुटपिट र चौकीमा आक्रमण गरेको आरोपमा पक्राउ गरिएको छ।
४० वर्षीय दासलाई मंगलबार बागमती नगरपालिकास्थित इलाका प्रहरी कार्यालय कर्मैयाअगाडि पक्राउ गरिएको हो। सर्लाही प्रहरीका सूचना अधिकारी डिएसपी सरोज राईका अनुसार, असोज १७ गते साँझ वडाध्यक्ष दासको नेतृत्वमा प्रहरी चौकी गोडैतामा ढुंगामुढा र प्रहरी कुटपिट गरिएको आरोप छ।
चौकी इन्चार्जको दाँत भाँचियो, पाँच प्रहरी घाइते
प्रहरी आक्रमणमा चौकी इन्चार्ज प्रहरी नायब निरीक्षक (सई) अवधेशप्रसाद यादवको अगाडिका दुई दाँत भाँचिएको र अन्य पाँच प्रहरी कर्मचारी घाइते भएको डिएसपी राईले जानकारी दिनुभयो। ढुंगामुढा र बाँसको भाठा प्रहार हुँदा तीनवटा मोटरसाइकलमा पनि क्षति पुगेको प्रहरीले जनाएको छ।
चन्दा उठाउने विवादपछि आक्रमण
दुर्गा पूजाका लागि चन्दा उठाउने विवादपछि घटना भएको जनाइएको छ। स्थानीय कारिल यादवलाई अनिलराय यादवसहितले कुटपिट गरेको विषयमा छलफल गर्न वडाध्यक्ष दास प्रहरी चौकी पुगेका थिए। त्यसक्रममा आक्रमण भएको प्रहरीको आरोप छ।
कुटपिटको आरोपमा ठेकेदार समेत रहेका अनिलराय यादव प्रहरी नियन्त्रणमा छन्।
राजनीतिक पूर्वाग्रहको आरोप, गोडैता बजार बन्द
वडाध्यक्ष दासको पक्राउको विरोधमा गोडैता बजार बुधबार बिहानदेखि बन्द गरिएको छ। गोडैता नगरपालिकाका प्रमुख देवेन्द्रकुमार यादवले दासलाई राजनीतिक पूर्वाग्रहका आधारमा पक्राउ गरिएको आरोप लगाउनुभएको छ।
दासमाथि कुटपिट, अंगभंग, ज्यान मार्ने उद्योग र आपराधिक उपद्रो मुद्दामा अनुसन्धानका लागि सर्लाही जिल्ला अदालतबाट म्याद थप गरिने तयारी प्रहरीले गरिरहेको छ। अहिले उनी जिल्ला प्रहरी कार्यालय मलङ्गवाको हिरासतमा छन्।
