काठमाडौं । इलाम–१ मा मतगणना सुरु भएको चौथो दिनसम्म पनि अन्तिम परिणाम सार्वजनिक हुन सकेको छैन। कुल ६३ हजार ६ सय ९५ मत खसेको यस क्षेत्रमा गणना ढिलो भइरहेकाले सर्वत्र चासो बढेको छ। इलामका अग्रज पत्रकार सटेन्द्र जबेगू का अनुसार राजनीतिक दलहरूको सहमतिमा एक–एक बुथका मत पालैपालो गणना गर्ने प्रक्रिया अपनाइएकाले समय बढी लागिरहेको छ। साथै गणनास्थल साँघुरो हुनु र सीमित जनशक्ति मात्रै खटाइनु पनि ढिलाइको मुख्य कारण रहेको उनले बताए।
उनका अनुसार प्रत्येक मतपेटिकाबाट मत निकालेर छुट्याउने (सर्टिङ) काम पालैपालो गरिँदा प्रक्रिया लम्बिने गरेको छ। सुरुदेखि नै उम्मेदवारबीच मतान्तर कम भएकाले गणनास्थलमा उपस्थित दलका प्रतिनिधिहरूबीच बेलाबेला हुने विवादले पनि गणनामा अवरोध सिर्जना गरिरहेको छ।
यहाँ खसेको ६३ हजार ९ सय ९५ मतमध्ये आइतबार बिहान ११ः४० बजेसम्म ५७ हजार ३ सय ९७ मत गणना भइसकेको छ। अझै ६ हजार ५ सय ९८ मत गणना गर्न बाँकी रहेको छ। बाँकी मत गणना गर्न सोमबार दिउँसो २ बजेसम्म लाग्न सक्ने अनुमान गरिएको छ। साविक मेची अञ्चल का चार जिल्लामध्ये तीन जिल्लाको मतपरिणाम आइतबार नै सार्वजनिक भइसकेको छ। अब उक्त अञ्चलमा इलाम–१ को परिणाम मात्रै आउन बाँकी रहेको छ।
