उदयपुरको लिम्चुङबुङ गाउँपालिकामा पछिल्ला वर्षहरूमा क्यान्सर, उच्च रक्तचाप, मधुमेह र श्वासप्रश्वाससम्बन्धी नसर्ने रोगका बिरामी बढेका छन्। गत वर्ष मात्र १४ जना क्यान्सरका बिरामी भेटिएका छन् भने २०७९ देखि २०८१ सम्म सात जनाको क्यान्सरका कारण मृत्यु भएको छ।
स्वास्थ्य परीक्षणमा मधुमेह, सिओपिडी र अधिक तौलका बिरामी पनि भेटिएका छन्। स्वास्थ्यकर्मीका अनुसार नियमित स्वास्थ्य परीक्षण, स्वस्थ खानपान, व्यायाम तथा सुर्ती–मदिरा सेवन नियन्त्रणले यस्ता रोगको जोखिम घटाउन सकिन्छ।
नेपाल स्वास्थ्य अनुसन्धान परिषद्का अनुसार नेपालमा प्रत्येक वर्ष करिब २६ हजार नयाँ क्यान्सरका बिरामी थपिन्छन् र करिब १९ हजार जनाको क्यान्सरकै कारण मृत्यु हुने अनुमान छ। अध्ययनले समयमै पहिचान, जनचेतना अभिवृद्धि, उपचार सेवा विस्तार र रोकथामका कार्यक्रमलाई प्रभावकारी बनाउनुपर्ने आवश्यकता औँल्याएको छ।
