काठमाडौं । नेपालीहरुको नयाँ वर्ष २०८०को पूर्वसन्ध्यामा जहाज चार्टर गरेर चिनियाँ पर्यटक नेपाल घुम्न आएका छन् । विहिबार एउटै उडानबाट काठमाडौं आएका १८० जना चिनियाँ पर्यटकलाई संस्कृति, पर्यटन तथा नागरिक उड्डयन मन्त्री सुदन किराँतीले स्वागत गरेका छन् ।
नेपाल भ्रमणमा आएका चिनियाँ पर्यटकहरुलाई त्रिभुवन अन्तर्राष्ट्रिय विमानस्थलमा पञ्चेबाजासहित स्वागत गरिएको छ । हिमालय एयरलाइन्सको जहाज चार्टर गरी आएका चिनियाँ पर्यटकलाई चिनियाँ राजदूत र नेपाल पर्यटन बोर्डका कर्मचारीले समेत स्वागत गरेका छन् । कोरोना महामारी पछि एकै पटक धेरै सङ्ख्यामा चिनियाँ पर्यटक भित्रिएको यो पहिलो भएको पर्यटन मन्त्रालयले जनाएको छ ।
