बाठमाण्डौँ । जिल्ला समन्वय समिति (जिसस) कैलालीको प्रमुखका लागि नागरिक उन्मुक्ति पार्टी (नाउपा) ले दर्ता गरेको उम्मेदवारी फिर्ता लिने भएको छ । सो पार्टीबाट रुपमती डंगौरा थारुले उम्मेदवारी दर्ता गर्नुभएको थियो । जिल्ला समन्वय समिति कैलालीमा नेपाली काँग्रेस र नेकपा (एमाले) ले गठबन्धन गरेपछि नागरिक उन्मुक्ति पार्टीले उम्मेदवारी फिर्ता लिने निर्णय गरेको हो । नागरिक उन्मुक्ति पार्टीका प्रवक्ता दामोदर पण्डितले जिसस कैलालीको प्रमुख पदका लागि उम्मेदवारी दर्ता गरिएको भएपनि पार्टीले उम्मेदवारी फिर्ता लिने निर्णय गरेको बताउनुभयो ।
उहाँले भन्नुभयो, ‘कैलालीमा २५ वटा भोट मात्र हो । १३ भोटले विजयी हुन्छ, कैलाली जिल्लामा नागरिक उन्मुक्ति पार्टी ठुलो दल हो । गठबन्धनका कारण उम्मेदवारी फिर्ता लिने निर्णय गरेका हौं । हामी पनि गठबन्धन सरकारमा छौं ।’ उम्मेदवारी फिर्ता लिने सहमति भएको नागरीक उन्मुक्ति पार्टीका संसदीय दलका नेता गंगाराम चौधरीले जानकारी दिनुभयो । बुधवार बिहान ९ देखि १ बजेसम्म उम्मेदवारी फिर्ताको समय रहेको छ । उम्मेदवारी दर्ता गरेको नागरिक उन्मुक्तिले फिर्ता लिएपछि काँग्रेसका उम्मेदवार टीकाकुमारी चौधरी भुल निर्विरोध निर्वाचित हुनु हुनेछ ।
भुल कैलारी गाउँपालिका –२ बाट दलित महिला सदस्यमा विजयी हुनुभएको थियो । कांग्रेसबाट जिल्ला समन्वय समिति, कैलालीको प्रमुखमा विजयी भएका पदमबहादुर कलेलको २०७९ पुस २३ गते निधन भएपछि सो पदमा उपनिर्वाचन हुन लागेको हो । भुलको समर्थकमा कैलारी गाउँपालिका अध्यक्ष राजसमझ चौधरी रहनुभएको छ । प्रस्तावकमा धनगढी उपमहानगरपालिका उपमेयर कन्दकला राना थारु हुनुहुन्छ । गोरखापत्र