काठमाडौं । घोराही-तुलसीपुर सडकखण्डअन्तर्गत घोराही उपमहानगरपालिका–१६ सेवारखोलामा पुल निर्माणका लागि खनेको खाल्डोमा मोटरसाइकल खस्दा दुईजनाको मृत्यु भएको छ। दुर्घटनामा मृत्यु हुनेमा रोल्पा त्रिवेणी गाउँपालिका–७ का २८ वर्षीय जीतेन्द्र बुढाथोकी र तुलसीपुर उपमहानगरपालिका–१७ का ३९ वर्षीय कमल वली रहेका छन्। जिल्ला प्रहरी कार्यालय दाङका सूचना अधिकारी एवं प्रहरी नायव उपरीक्षक रमेश बोहराका अनुसार, उनीहरू बिहान साढे नौ बजेतिर घोराहीबाट तुलसीपुरतर्फ जाँदै थिए।
मोटरसाइकल खाल्टोमा खस्दा गम्भीर घाइते भएका बुढाथोकी र वलीलाई तत्काल राप्ती स्वास्थ्य विज्ञान प्रतिष्ठानमा लैजाने प्रयास गरिएको थियो। चिकित्सकहरूले साढे १० बजेतिर उनीहरूको मृत्यु पुष्टि गरेका थिए। प्रहरीले घटनाको थप विवरण संकलन गर्दै छ र पुल निर्माण क्षेत्रमा सुरक्षा व्यवस्था कडा गर्ने निर्देशन दिएको छ।
