दाङको टरिगाउँ विमानस्थलमा डेढ महिनापछि बिहीबार नेपाल एयरलाइन्सको जहाज अवतरण गरेको छ। मौसमका कारण लामो समयदेखि अनियमित बनेको दाङ–काठमाडौं हवाई सेवा अब नियमित हुने नेपाल नागरिक उड्डयन प्राधिकरणका वरिष्ठ अधिकृत प्रदीप भुसालले बताएका छन्।
नेपाल एयरलाइन्सको १९ सिटे जहाजमा बिहीबार काठमाडौंँबाट ८ जना र दाङबाट ४ जना यात्रुले हवाई सेवा लिएका थिए। अब आइतबार, मंगलबार, बिहीबार र शुक्रबार गरी सातामा चार दिन उडान हुने बताइएको छ। बिहान ९ बजेदेखि ११ बजेको बीचमा सेवा उपलब्ध हुने र हाल भाडादर करिब १२ हजार रुपैयाँ रहेको छ।
टरिगाउँ विमानस्थलको धावनमार्ग ७५० मिटर मात्रै भएकाले १९ सिटे जहाज मात्र सञ्चालन गर्न सकिन्छ। हवाई सेवा नियमित नहुँदा दाङका यात्रुहरू नेपालगञ्ज वा भैरहवा पुग्नुपर्ने बाध्यता छ।
ठूला जहाज सञ्चालन हुनेगरी विमानस्थल विस्तारको माग लामो समयदेखि उठ्दै आए पनि हालसम्म पूरा हुन सकेको छैन। २०११ सालमा स्थापना भएको विमानस्थल स्तरोन्नतिका लागि चालु आर्थिक वर्षमा २५ करोड रुपैयाँ बजेट विनियोजन गरिएको छ।
