काठमाडौँ – भारतका विदेश सचिव विक्रम मिस्री दुईदिने औपचारिक भ्रमणका लागि आज नेपाल आउँदै छन् । परराष्ट्र मन्त्रालयका सचिव अमृतबहादुर राईको मैत्रीपूर्ण निमन्त्रणामा उनी नेपाल भ्रमणमा आउन लागेका हुन् ।
भ्रमणका क्रममा नेपालका परराष्ट्र सचिव राई र भारतीय विदेश सचिव मिस्रीबीच द्विपक्षीय वार्ता हुने कार्यक्रम रहेको परराष्ट्र मन्त्रालयले जनाएको छ । वार्तामा नेपाल–भारत सम्बन्धका विविध पक्षको समीक्षा गर्नुका साथै दुवै देशको साझा हितसँग सम्बन्धित विषयमा छलफल तथा विचार आदानप्रदान गरिनेछ ।
यस भ्रमणले नेपाल र भारतबीच लामो समयदेखि कायम रहेको घनिष्ठ एवं मैत्रीपूर्ण सम्बन्धलाई थप मजबुत बनाउन सहयोग पुग्ने विश्वास मन्त्रालयले व्यक्त गरेको छ । नेपाल बसाइका क्रममा भारतीय विदेश सचिव मिस्रीले नेपालका उच्चस्तरीय विशिष्ट व्यक्तित्वहरूसँग शिष्टाचार भेटघाटसमेत गर्ने कार्यक्रम छ । दुईदिने औपचारिक भ्रमण पूरा गरी मिस्री कात्तिक १९ गते काठमाडौँबाट नयाँ दिल्ली प्रस्थान गर्ने परराष्ट्र मन्त्रालयले जनाएको छ ।
