काठमाडौं १८ बैशाख । वैशाख ३० गते हुने स्थानीय तहको निर्वाचनका लागि बाँके र बर्दियाको नेपाल–भारत सीमा नाका ७२ घण्टा बन्द गरिने भएको छ । भारतको कतर्नियामा भएको दुई देशका सुरक्षा अधिकारीहरुको बैठकले खुला सीमाका कारण निर्वाचनको बेला सुरक्षा चुनौती बढ्न सक्ने भन्दै ७२ घण्टासम्म सीमा नाका बन्द गर्ने निर्णय गरेको हो ।
बाँकेका प्रमुख जिल्ला अधिकारी सूर्यबहादुर खत्रीका अनुसार निर्वाचनका बेला नाका सिल गर्नुका साथै दशगजा क्षेत्रमा कडाइ गरिनेछ । त्यस्तै, दुई देशका सुरक्षाकर्मीले संयुक्तरूपमा गस्ती गर्ने, ४८ घण्टाअघि दुई देशका सीमाक्षेत्रमा मदिराको बेचविखन र सेवनमा रोक लगाउने निर्णय भएको प्रजिअ खत्रीले जानकारी दिए ।