काठमाडौं १४ असार । प्रधान सेनापति प्रभुराम शर्मा अमेरिका भ्रमणमा रहेका छन् । भ्रमणको क्रममा शर्माले मित्रराष्ट्र संयुक्त राज्य अमेरिकाका लागि नेपाली राजदूत श्रीधर खत्रीसँग शिष्टाचार भेटवार्ता गरेका छन् । असार १२ आइतबार अमेरिका पुगेका प्रधान सेनापति शर्माले सोही दिन अमेरिकाका लागि नेपाली राजदूत खत्रीसँग शिष्टाचार भेटवार्ता गरेका हुन् । यो सँगै संयुक्त राष्ट्रसंघको आह्वानमा शान्ति स्थापनार्थ नेपाली शान्ति सैनिकहरु तैनाथ लेबनान र सिरिया मिसनको निरीक्षण भ्रमण सम्पन्न गरी शर्माले सोही क्रममा अमेरिकाको औपचारिक भ्रमण पनि गरेका हुन्।
अमेरिका भ्रमणमा रहेका शर्माले क्वान्टिको भर्जिनियास्थित मरीन कोर्प्सको राष्ट्रिय सङ्ग्रहालय र मरीन कोर्प्स बेसको अवलोकन गरेका छन् । यसैगरी, शर्माले क्वान्टिको भर्जिनियास्थित मरीन कोर कमाण्ड र स्टाफ कलेजको भ्रमण गर्नुभई उक्त कलेजको तालिमलगायत विविध पक्षका बारेमा जानकारी लिएका छन् ।
