काठमाडौं । मकवानपुरको मनहरी गाउँपालिका ६ स्थित रुपाचुरीका सरोज प्रजाको विवाहमा गएकाहरुमाथि कुटपिट भएको छ। प्रहरीले कुटपिटमा संलग्न दुई जनालाई पक्राउ गरेको छ ।
विवाहमा गएका मनहरी गाउँपालिका ७ रमनटारका करिब २८ वर्षीय उज्वल थिङ र राक्सिराङ गाउँपालिका ५ चुरेडाँडाका वर्ष ३० का रोनिस लामामाथि कुटपिट भएको हो । कुटपिटबाट घाइते भएका थिङको मनहरी अस्पतालमा सामान्य उपचारपश्चात् थप उपचारका लागि पुरानो मेडिकल कलेज भरतपुर चितवन पठाएको छ । प्रहरीका अनुसार थिङको शरीरमा भित्री चोट लागेका कारण अवस्था गम्भीर रहेको र लामाको मुखमा चोट लागेको छ ।
कुटपिटमा संलग्न रहेको अभियोगमा प्रहरीले मनहरी ६ रुपाचुरीका वर्ष २९ का इमान घलान, वर्ष २२ का मनिक घलानलाई पक्राउ गरेको बागमती प्रदेश प्रहरी कार्यालयले जनाएको छ । साथै कुटपिटमा संलग्न अन्य व्यक्तिको खोज भइरहेको प्रहरीले जनाएको छ ।