काठमाडौं । गोरखाको सहिदलखन गाउँपालिका–८ मा रहेको महादेव थुम्काडाडामा आधारभूत स्वास्थ्य केन्द्र भवन निर्माण सम्पन्न भएको छ । विगत ५ वर्षदेखि आमा समूहले बनाएको सामुदायिक भवनबाट बुङकोटवासीहरुलाई स्वास्थ्य सेवा दिँदै आएकोमा नयाँ भवनबाट सेवा सुचारु गरिने सहिदलखन गाउँपालिकाका प्रमुख प्रशासकीय अधिकृत बाबुराम मगरले जानकारी दिनुभयो ।
सहिदलखन गाउँपालिकाको बुङकोट आधारभूत स्वास्थ्य केन्द्रको ४ कोठे पक्की भवन निर्माण गर्नका लागि कल्याण निर्माण सेवासँग २०७९ साल माघ ११ गते सम्झौता गरिएको थियो । सम्झौतामा २०८० असार मसान्तसम्म भवन निर्माण सम्पन्न गर्नुपर्ने सम्झौतामा उल्लेख भएता पनि समयमा काम सम्पन्न नभएपछि निर्माण कम्पनीले विभिन्न कारण देखाउँदै २०८० पुस मसान्तसम्म म्याद थपिए अनुसार काम सम्पन्न भएको गाउँपालिका इन्जिनियर मेघनाथ यादवले बताउनुभयो ।
आधारभूत स्वास्थ्य केन्द्र भवन निर्माणको लागि गाउँपालिकाको आफ्नै बजेटमा कुल ५४ लाख ९१ हजार ५ सय ५६ रुपियाँमा गाउँपालिका र निर्माण कम्पनी बिच सम्झौता भएको हो । आधारभूत स्वास्थ्य केन्द्रको नाममा रहेको जग्गा १ रोपनी १४ आना रहेकोमा भवन ५ आनामा सम्पन्न भएको हो । निर्माण सम्पन्न भएको स्वास्थ्य भवनमा पक्की ४ कोठा छ। आगामी चैत्रबाट सबै सेवा नयाँ भवनबाट दिने गरी तयारी थालिएको छ । चार कोठे भवन निर्माणसँगै सेवा प्रवाह सहज हुने गाउँपालिकाका स्वास्थ्य शाखा प्रमुख वीरेन्द्र कुमार श्रेष्ठको विश्वास छ । स्वास्थ्य भवन नहुँदा सेवा प्रवाह गर्न असहज भएको थियोू, उहाँले भन्नुभयो, अब विश्वास गरौँ, त्यहाँबाट काम सुरु भएपछि बुङकोटवासीलाई निकै नै सजिलो हुन्छ ।