काठमाडौं । समुदाय मिलेर विद्युत् विस्तार गरिएका स्थानमा विद्युत् अनियमितता बढेको छ । पाल्पा जिल्लाको विभिन्न स्थानमा दुई दशकदेखि सामुदायिक विद्युतीकरणमार्फत बिजुलीबत्ती विस्तार भएका स्थानमा विद्युत् अवरोध बढेको हो ।
ती क्षेत्रमा बिजुलीबत्ती अनियमित हुने, बिग्रिएका स्थानमा लामो समयसम्म मर्मतसम्भार नहुने कारणले उपभोक्ता समस्यामा परेका छन् । समुदायबाट सञ्चालित विद्युतीकरणमार्फत विद्युत् विस्तार भएका स्थानमा काठका पोल भाँचिदा फेर्न समय लाग्ने गरेको छ । यस्तै ट्रान्सफर्मर बिग्रिएमा बनाउन आर्थिक अभाव हुँदा उपभोक्ता समस्यामा परेका छन् । हावाहुरीले तार चुँडिएर समयमै मर्मत नहुँदा लामो समयसम्म विद्युत् अवरोध हुने गरेको छ । रैनादेवी छहरा–३, अमिलेका स्थानीय बासिन्दा विष्णुप्रसाद ज्ञवालीले उपभोक्तासँग समयमै मर्मतसम्भार गर्न रकम अभाव हुने समस्याले बिजुलीबत्ती अवरोध हुने गरेको सुनाउनुभयो ।
नेपाल विद्युत् प्राधिकरणसँग आबद्ध ४० हजार २५४ ग्राहक छन् । यस्तै जिल्लाका नौ वटा संस्थामार्फत सामुदायिक विद्युतीकरणमार्फत बिजुलीबत्ती बाल्ने पाँच हजार ८५६ ग्राहक रहेका छन् । विद्युत् विस्तार भएका क्षेत्रमा उपभोक्ताले काम गर्न नसकेपछि विद्युत् प्राधिकरण मातहत ल्याउने प्रयास भइरहेको पाल्पा वितरण केन्द्रका प्रमुख दिलीप मरासिनीले बताउनुभयो । संस्थाबाट विद्युतीकरण भएका स्थानबाट विद्युत् अवरोध भएको, उपभोक्ताले काम नगरेको गुनासो आउने गरेको उहाँले बताउनुभयो । सामुदायिक विद्युतीकरणमार्फत बिजुलीबत्ती बालेका उपभोक्ताले प्रतियुनिट छ रुपियाँ २५ पैसा प्राधिकरणलाई बुझाउनु पर्छ । बाँकी संस्थाले नियमित सञ्चालन गर्न उपभोक्ताबाट उठाउँदै आएको छ । यद्यपि उपभोक्ताबाट नियमित महसुल उठ्न नसक्दा सामुदायिक विद्युतीकरणका लागि बनेका संस्था धराशायी बनेर विद्युत्को नियमित समस्या समाधान गर्न नसकेको विद्युत् प्राधिकरण वितरण केन्द्रका सूचना अधिकारी भागीरथ बस्यालले बताउनुभयो ।