काठमाडौं । कास्कीको रुपा गाउँपालिकामा बिहीबार साँझ अचानक आएको हावाहुरीका कारण १४ घरमा क्षति पुगेको छ । रुपा गाउँपालिका १ र २ वडाका स्थानीयको घरमा क्षति पुर्याएको जिल्ला प्रहरी कार्यालय कास्कीले जनाएको हो ।
हावाहुरीसँगै आएको वर्षाका कारण रुपा गाउँपालिका १ र २ वडाका स्थानीयको घर, गोठ र मन्दिरमा आंशिक क्षति पुगेको जिल्ला प्रहरी कार्यालय कास्कीका डिएसपी वसन्त कुमार शर्माले जानकारी दिनुभयो । उहाँका अनुसार हावाहुरीले घरको छानो उडाउँदा घरभित्र राखिएका अन्नपात,लत्ताकपडा समेत भिजेको छ । यस्तै, हावाहुरीले बाख्राको खोर, माहुरीको घार, चिसापानीस्थित कोट मन्दिरको छानोसमेत उडाएको छ । हावाहुरीका कारण मानवीय क्षति भने भएको छैन । यस्तै बिहीबार नै अचानक आएको हावाहुरीका कारण फेवातालमा फसेकी विदेशी नागरिकको सकुशल उद्धार गरिएको थियो। सशस्त्र प्रहरीको टोलीले अस्ट्रियाका २७ वर्षीय नागरिक लाउराको सकुशल उद्धार गरेको हो । गोरखापत्र