शीर्ष नेताहरूबिच समसामयिक विषयमा छलफल

Published on

काठमाडौं । प्रधानमन्त्री एवं नेपाल कम्युनिस्ट पार्टी (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले सत्ता साझेदार दल र प्रमुख प्रतिपक्षी दलका शीर्ष नेतासँग संवाद गर्नुभएको छ । प्रधानमन्त्री प्रचण्डले नेपाली कांग्रेसका सभापति शेरबहादुर देउवा र नेपाल कम्युनिस्ट पार्टी (एमाले) का अध्यक्ष केपी शर्मा ओलीसँग समसामयिक राजनीतिक सन्दर्भमा छलफल गर्नुभएको हो । प्रधानमन्त्री निवास बालुवाटारमा सोमबार भएको शीर्ष नेताको बैठकमा सरकार, संसद्, सङ्क्रमणकालीन न्यायसहित विभिन्न विषयमा छलफल भएको हो । सभापति देउवा र अध्यक्ष ओलीसँगको छलफललगत्तै प्रधानमन्त्री प्रचण्डले नेपाल कम्युनिस्ट पार्टी (एकीकृत समाजवादी) का अध्यक्ष माधवकुमार नेपालसँग पनि छलफल गर्नुभयो । बैठकपछि कांग्रेस प्रवक्ता डा। प्रकाशशरण महतले संसद् र समितिमा रहेका विधेयकलाई अन्तिम रूप दिने तथा संसद्का कामकारबाहीका सन्दर्भमा छलफल भएको बताउनुभयो । प्रधानमन्त्रीका प्रेस सल्लाहकार गोविन्द आचार्यले पनि समसामयिक राजनीतिक सन्दर्भमै संवाद भएको जानकारी दिनुभयो ।

डा। महतका अनुसार बेपत्ता पारिएका व्यक्तिको खोजबिन, सत्य निरूपण तथा मेलमिलाप आयोग ऐन संशोधन विधेयकलाई अन्तिम रूप दिनुपर्ने भएकाले प्रधानमन्त्री प्रचण्डले शीर्ष नेतासँग छलफल गर्नुभएको हो । उहाँले कानुन, न्याय तथा मानव अधिकार समितिमा रहेको विधेयक तथा सत्य निरूपण तथा मेलमिलाप आयोग, बेपत्ता छानबिन आयोगको कामसहित सङ्क्रमणकालीन न्यायको सवाललाई कसरी टुङ्ग्याउने भन्ने विषयमा छलफल भएको बताउनुभयो । उहाँले भन्नुभयो, “तर औपचारिक सहमति भइसकेको छैन । छलफल हुँदै छ । एमाले संसदीय दलका प्रमुख सचेतक महेशकुमार बर्तौलाले प्रधानमन्त्री प्रचण्डले सत्ता साझेदार दलसँग प्रमुख प्रतिपक्षी दललाई पनि विश्वासमा लिएर अगाडि बढ्ने अभिप्रायसाथ कानुन निर्माणदेखि समसामयिक सन्दर्भसम्म छलफल भएको बताउनुभयो । उहाँले भन्नुभयो, “धेरै काम गर्नु छ । सरकार र संसद्मा समझदारीका साथ जानुपर्ने छ । त्यसैले सत्ता साझेदार दल र प्रमुख प्रतिपक्षी दलका नेताबिच कुनै न कुनै विषयमा सहकार्यको वातावरण बनाउने अभिप्रायले नै उहाँहरूले छलफल गर्नुभएको हो ।”

अध्यक्ष नेपालसँग पनि छलफल

प्रधानमन्त्री प्रचण्ड र अध्यक्ष ओलीले नेपाल कम्युनिस्ट पार्टी (एकीकृत समाजवादी) अध्यक्ष माधवकुमार नेपालसँग पनि छलफल गर्नुभएको छ । प्रधानमन्त्री कार्यालय सिंहदरबारमा उहाँहरूबिच प्रदेश सरकारका सन्दर्भमा छलफल भएको हो । एमाले प्रमुख सचेतक बर्तौलाले सत्ता साझेदार दलबिचको समझदारीसहित नागरिक उन्मुक्ति पार्टीलाई सरकारमा कसरी सामेल गराउने भन्ने सन्दर्भमा शीर्ष नेताबिच छलफल भएको बताउनुभयो । उहाँले भन्नुभयो, “अन्य समसामयिक सन्दर्भमा छलफल त हुने नै भयो । मुख्य रूपमा छलफल यही विषयमा हो । एकीकृत समाजवादीका उपाध्यक्ष डा। वेदुराम भुसालले कोशी प्रदेश सरकारमा सहभागिता, मधेश प्रदेश सरकार, सुदूरपश्चिम सरकारमा सत्ता साझेदार दलको सहभागितासहित राजनीतिक समझदारीका विविध विषयमा छलफल भएको बताउनुभयो ।

नागरिक उन्मुक्ति सरकारमा जाने

नागरिक उन्मुक्ति पार्टी सङ्घीय सरकारमा सामेल हुने भएको छ । नागरिक उन्मुक्ति पार्टी अध्यक्ष रञ्जिता श्रेष्ठ चौधरीले प्रधानमन्त्री पुष्पकमल दाहाल ‘प्रचण्ड’ सँग सरकारमा सहभागी हुने विषयमा छलफल भएको जानकारी दिनुभएको छ । प्रधानमन्त्री प्रचण्डलाई गत साता भएको छलफलपछि अध्यक्ष श्रेष्ठले एक मन्त्री र एक राज्यमन्त्रीसहित सरकारमा जाने तयारी भइरहेको बताउनुभयो । उहाँले भन्नुभयो, “मन्त्रालय कुन हुन्छ भन्ने कुरा छलफलमै छ । फाइनल भएको छैन तर एक हप्ताभित्रै नागरिक उन्मुक्ति सरकारमा जाने चाहिँ निश्चित हो ।”

ताजा समाचार

राष्ट्रपतिको युरोप भ्रमण: जलवायु परिवर्तनमा नेपालको प्राथमिकता केन्द्रमा रहनुपर्ने मुद्दा स्थापित

काठमाडौँ । राष्ट्रपति रामचन्द्र पौडेलको स्वीट्जरल्याण्ड र जर्मनीको भ्रमणले जलवायु परिवर्तनको असर न्यूनीकरणको मुद्दा...

फिल्डिङ र ब्याटिङमा कमजोरी भए : आगामी दिनमा सुधार गर्छौँ स् कप्तान पौडेल

काठमाडौँ ।नेपाली राष्ट्रिय क्रिकेट टिमका कप्तान रोहितकुमार पौडेलले अमेरिका र वेस्ट इण्डिजको मैदान नै...

हामी जतिसक्दो महाकाली पुल छिटो सम्पन्न गर्ने पक्षमा छौँ

कञ्चनपुरको भीमदत्त नगरपालिका–१२ ओदाली स्थित महाकाली नदीमा निमार्णाधिन चारलेनको पक्की पुल निमार्णको अन्तिम चरणमा...

एडिबीबाट भुटानलाई चार करोड अमेरिकी डलर ऋण स्वीकृत

काठमाडौँ । एसियाली विकास बैङ्क (एडिबी)ले बिहीबार भुटानलाई सार्वजनिक वित्तीय व्यवस्थापन र हरित विकासलाई...