काठमाडौं । फेँदिखोला गाउँपालिकाले सामुदायिक विद्यालयका विद्यार्थीमार्फत ७५० केजी प्लाष्टिकजन्य फोहोर सङकलन गरेको छ । पहिलो चरणमा सङकलित प्लाष्टिकजन्य फोहोर यहाँका २१ सामुदायिक विद्यालयमध्ये १० विद्यालयका विद्यार्थीले फोहोर जम्मा गरेका हुन् । विद्यालय र घरलाई प्लाष्टिक मुक्त बनाउने उद्देश्यले पालिकाले फोहोर सङ्कलन अभियान अगाडि बढाएको हो । विद्यार्थीद्वारा सङकलित प्लाष्टिकजन्य फोहोर मैला व्यवस्थापन कार्यविधि २०८० निर्माण गरेर अभियान अघि बढाएको छ ।
पालिका अध्यक्ष घनश्याम सुबेदीले विद्यार्थीले जम्मा गरेको फोहोर विद्यालयमा ल्याएपछि पालिकाले प्रतिकेजी १० रुपियाँ प्रोत्साहन स्वरुप गाउँपालिकाले प्रदान गर्ने बताउनुभयो । यसको नियमन गर्न प्रत्येक विद्यालयमा पाँच सदस्यीय विद्यालय स्तरीय फाहोर मैला व्यवस्थापन समन्वय समिति गठन गरिएको सुवेदीले बताउनुभयो । पालिकालाई प्लाष्टिकजन्य फोहोरमुक्त बनाउन विद्यालयबाट अभियान सुरु गरिएको बताउँदै सुवेदीले पालिकाले प्रशोधन केन्द्र पोखरासम्म ढुवानीको व्यवस्थापन गर्ने बताउनुभयो । पुरस्कारस्वरुप विद्यार्थीले पाउने रकम गाउँपालिकाले निःशुल्क खोलेको बैंक खातामा जम्मा गर्ने बताइएको छ । सिद्धार्थ माविका प्रधानाध्यापक लक्ष्मण शर्माले फोहोर न्युनीकरणमा बिद्यार्थीलाई जोड्ने अभियान प्रशंसनीय रहेको बतााउनुभयो । प्लाष्टिकजन्य फोहोर सबैभन्दा धेरै वडा ५ को मैदान माबिका बिद्यार्थीले ३८४ केजी फोहोर जम्मा गरेको छ । सिदार्थ माबिले १५२ केजी जम्मा गरेको शिक्षा तथा खेलकुद शाखा प्रमुख रामचन्द्र गुरुङले बताउनुभयो ।
कार्यक्रम लागू भएसँगै यहाँका विद्यार्थीले आफ्नो घरबाट निस्किने प्लाष्टिकजन्य फाहोर गाउँपालिकाले उपलब्ध गराएको बोरामा संकलन गरेका छन् । यहाँ हरेक छ महिनाको अन्तरमा पालिकामा फोहोर जम्मा गरने गरिएको छ । बिद्यार्थीलाई प्रोत्साहन स्वरुप बर्षमा एक पटक खातामा केही रकम पठाइने गरिएको छ । गोरखापत्र
