काठमाडौं । अविरल वर्षापछि आएको पहिरोका कारण हेटौँडा हुँदै काठमाडौँ जाने छोटो दूरीको मार्गहरुमध्ये तीन वटा सडक अवरुद्ध बनेकोमा कुलेखानी–सिस्नेरी–दक्षिणकाली सडक बिहानबाट सुचारु भएको छ ।
कुलेखानी–सिस्नेरी–दक्षिणकाली सडकको मकवानपुरको इन्द्रसरोबर गाउँपालिका २ छेपारेस्थित सडक खण्डमा आएको पहिरो पन्छाएर शनिबार बिहान ९ः१५ बजेबाट अवरुद्ध सडक सुचारु गरिएको जिल्ला प्रहरी कार्यालय मकवानपुरले जनाएको छ । शुक्रबारदेखिको अविरल वर्षापछि कुलेखानी–सिस्नेरी–दक्षिणकाली सडकको मकवानपुरको इन्द्रसरोबर गाउँपालिका २ छेपारेस्थित सडक खण्डमा सडकमाथिबाट पहिरो आई सडक शनिबार बिहान २ः५० बजेबाट पूर्णरुपमा अवरुद्ध भएको थियो । यस्तै, इन्द्रसरोबर गाउँपालिका ५ महालक्ष्मी खोला नजिक मातातीर्थ–चखेल–देउराली जाने सडक खण्डमा पहिरो गएर उक्त सडक खण्डमा शनिबार बिहान ७ बजेबाट पूर्ण अवरोध भएको छ । पहिरो हटाएर सडक सुचारु गर्ने कार्य भइरहेको प्रहरीको भनाइ छ ।
उता भीमफेदी गाउँपालिका ४ रातोमाटेमा पहिरो गएर सडक अवरुद्ध बनेको छ ।
यसैगरी कान्ति लोकपथ अन्तर्गत मकवानपुर खण्डमा चार स्थानमा पहिरो गएको छ । कान्ति लोकपथ अन्तर्गत भीमफेदी गाउँपालिका ८ स्थित प्रतापडाँडा, महादेवटार र बकैया गाउँपालिका १२ को आले र वडा नं.११ को सिमात घुम्तीमा पहिरो खसी उक्त सडक खण्ड शनिबार बिहान २ः१० बजेबाट पूर्ण रुपमा बन्द रहेको छ । उक्त सडकको ललितपुरतर्फको सडक खण्डमा अवरोध रहेको जनाइएको छ । अवरुद्ध सडकहरु सुचारु गर्न सडक विभागसँग समन्वय भइरहेको जनाइएको छ । हेटौँडाबाट पालुङ हुँदै काठमाडौँ जाने त्रिभुवनराजपथ सडकखण्ड र चित्लाङ–चन्द्रागिरी हुँदै काठमाडौँ निस्कने सडक अवरोध नभएको प्रहरीले जनाएको छ ।
