ठेक्का सम्झौताको सात वर्षसम्म पनि बनेन पुल

Published on

काठमाडौं । निर्माण व्यवसायीको चरम लापर्बाहीका कारण ठेक्का सम्झौताको सात वर्षसम्म पनि पुल निर्माण हुन सकेको छैन । दुई वर्षभित्रमा निर्माण सम्पन्न गर्ने सम्झौता गरिएको पुलको दुई वटा पिल्लर मात्र ठडिएका छन् । दाङको तुलसीपुर उपमहानगरपालिका–१३, गिधनियास्थित तुईखोलामा पुल निर्माणका लागि २०७४ सालमा २०७६ असोज मसान्तमा निर्माण सम्पन्न हुने गरी ठेक्का सम्झौता भएको थियो । सडक डिभिजन कार्यालयका अनुसार पुल निर्माणको ठेक्का नेपालगन्जको एडभेन्चर जेभीले पाएको थियो । ठेक्का सम्झौता अनुसार निर्धारित समयमा पुल नबने पनि चार पटक म्याद थप भइसकेको छ । चौथो पटक थप भएको म्याद अनुसार २०८० असार १४ सम्म निर्माण भइसक्नुपर्ने थियो तर निर्माण व्यवसायीको चरम लापर्बाहीका कारण निर्माणको कुनै काम हुन नसकेको स्थानीय अरुण नेपालीले बताउनुभयो ।

काम सुरु भएको यत्तिका वर्षसम्म पुल निर्माण नहुँदा सर्वसाधारणले निकै दुःख पाएका छन् । नेपालीले भन्नुभयो, “पुल निर्माणको काम सुरु हुँदा जनतामा खुसी छाएको थियो । बर्खाका बेला जोखिम मोलेर नदी तर्नुपर्ने दुःख हट्ने भयो झैँ लागेको थियो तर ठेकेदारले काम नै नगर्दा अब त पुल पनि बन्दैन कि झैँ लाग्छ ।” उहाँका अनुसार ७१ मिटर लम्बाइको पुल सात वर्षसम्म बन्न सकेको छैन । पुल निर्माण हुन नसक्दा स्थानीयलाई हिँडडुल गर्न साथै बालबालिकालाई विद्यालय आउजाउ गर्न समस्या हुने गरेको छ । निर्माण व्यवसायीलाई निर्माण कार्य अगाडि बढाउन आग्रह गर्दासमेत काम अघि नबढाएकाले ठेक्का तोडिएको सडक डिभिजन दाङका इन्जिनियर महेश विकले जानकारी दिनुभएको छ । ठेक्का तोडिएपछि निर्माण व्यवसायीले अदालतमा मुद्दा दायर गरेका छन् । “मुद्दा परे पनि केही समय काममा ढिलाइ होला,” उहाँले भन्नुभयो, “अब नयाँ आर्थिक वर्षको भदौमा नयाँ टेन्डर गरेर पुल निर्माणको कामलाई अघि बढाउने तयारीमा छौँ ।” निर्माण व्यवसायीको लापर्बाही र अटेरीका कारण पुल निर्माणमा ढिलाइ भएको दाबी उहाँको छ । इन्जिनियर विकले भन्नुभयो, “पुल निर्माणका लागि पटक पटक आग्रह गर्यौँ तर निर्माण व्यवसायीले काम गर्ने चासो नै नदेखिएपछि अहिले ठेक्का रद्द गरेर नयाँ प्रव्रिया थाल्नुपर्ने अवस्था आएको हो ।”

निर्माण व्यवसायीको लापर्बाहीका कारण दुई वर्षमा बन्नुपर्ने पुल सात वर्षसम्म बन्न नसक्दा ठेक्का तोड्न बाध्य भएको भनाइ उहाँको छ । ठेक्का रद्दविरुद्ध निर्माण व्यवसायीले दिएको मुद्दा पनि अदालतले खारेज गरिदिएको उहाँले सुनाउनुभयो । छ करोड ८२ लाख ३७ हजार लागतमा उक्त पुल निर्माणका लागि ठेक्का भएको थियो ।

ताजा समाचार

परराष्ट्रमन्त्री डा राणासँग अमेरिकी राजदूतको शिष्टाचार भेट

काठमाडौं । परराष्ट्रमन्त्री डा आरजु राणा देउवासँग नेपालका लागि अमेरिकी राजदूत डिन आर थम्पसनले...

प्रदर्शनकारीद्वारा बङ्गलादेशका सरकारी भवनमा आागजनी

काठमाडौं । बङ्गलादेशमा जारी आरक्षणविरोधी आन्दोलनका क्रममा प्रदर्शनकारीले एकैदिन धेरै सरकारी भवनमा आगो लगाइदिएका...

ओलम्पिकमा सहभागी हुन जाने नेपाली टोलीको बिदाइ

काठमाडौं । राष्ट्रपति रामचन्द्र पौडेलले ३३औँं गृष्मकालीन पेरिस ओलम्पिकमा सहभागी हुन जाने नेपाली खेलाडीलाई...

भगवानको कृपाले म बाँचे : पूर्वराष्ट्रपति ट्रम्प

काठमाडौं । पूर्व अमेरिकी राष्ट्रपति एवम् रिपब्लिकन राष्ट्रपति पदका उम्मेदवार डोनाल्ड ट्रम्पले आइतबार भएको...