काठमाडौँ । अमेरिकी राष्ट्रपति डोनाल्ड ट्रम्पले गाजा किन्न र स्वामित्वमा राख्न प्रतिबद्ध रहेको बताउनुभएको छ । संयुक्त राज्य अमेरिकाले युद्धग्रस्त एन्क्लेभलाई मध्यपूर्वका अन्य राष्ट्रलाई पुनर्निर्माण गर्न दिनसक्ने बताउनुभएको हो । राष्ट्रपति ट्रम्पले नेशनल फुटबल लिग सुपर बाउल च्याम्पियनसिपमा भाग लिन लुइसियानाको न्यू अर्लिन्स जाँदै गरेको एयर फोर्स वनमा पत्रकारहरूसँग उक्त धारणा व्यक्त गर्नुभएको हो । गत हप्ता इजरायली प्रधानमन्त्री बेन्जामिन नेतान्याहूसँगै ह्वाइट हाउसमा ट्रम्पले संयुक्त राज्य अमेरिकाद्वारा गाजाको दीर्घकालीन स्वामित्व प्रस्ताव गर्नुभएको थियो । उहाँको प्रस्तावको व्यापक आलोचना भएको थियो । धेरै अरब राष्ट्रहरू साथै युरोपमा रहेका अमेरिकी सहयोगीहरूले यसको विरोध गरेका छन् । सिन्ह्वा/न्यूज एजेन्सी नेपाल
