काठामाडौँ । गुल्मीको मरभुङ्गमा आइतबार बिहान गोठमा आगलागी हुँदा १२ वटा पशुचौपायाको जलेर मृत्यु भएको छ । मालिका गाउँपालिका–८ किलिबाङका तुलबहादुर घर्तिको ढुङ्गा माटोले बनेको गोठमा आगलागी हुँदा एक भैंसी र पाडीसहित खोरमा रहेका १० बाख्रा जलेर मरेको जिल्ला प्रहरी कार्यालय गुल्मीका प्रवक्ता प्रहरी नायब उपरीक्षक गङ्गाबहादुर सारुले जानकारी दिनुभयो । यसैगरी, खोरमा रहेका चार बाख्रा जलेर घाइते छन् । घटना लगत्तै मरभुङ्ग प्रहरीचौकीबाट प्रहरी सहायक निरीक्षक दिपक शाहको कमाण्डमा पुगेको प्रहरी टोली र स्थानीयले आगो नियन्त्रणमा लिएको सारुले बताउनुभयो । गोठ र बाख्राको खोर पूर्णरुपमा जलेर नष्ट भए पनि मानविय क्षति नभएको प्रहरीले जनाएको छ ।