काठमाडौं- बागमती प्रदेश सरकारले समस्याग्रस्त घोषित पाँचवटा सहकारी संस्थाका ऋणीहरूलाई आगामी भदौ मसान्त (भदौ ३१) भित्र ऋण तिर्न ताकेता गरेको छ। सहकारी तथा गरिबी निवारण मन्त्रालय अन्तर्गतको समस्याग्रस्त सहकारी व्यवस्थापन समितिको कार्यालय, काठमाडौंले आज सार्वजनिक सूचना प्रकाशित गर्दै ऋणीहरूलाई अन्तिम म्याद तोकेको हो।
समितिद्वारा ताकेता गरिएको सहकारी संस्थाहरूमा सिभिल, दर्शन, नेशनल नमोबुद्ध, लालीगुराँस र सुमेरु बचत तथा ऋण सहकारी संस्था रहेका छन्। ती संस्थाहरू क्रमशः २०८० भदौ २१, २०८१ कात्तिक ११ र २०८१ पुस २८ मा समस्याग्रस्त घोषणा गरिएको थियो।
सूचनामा ती संस्थाहरू समस्याग्रस्त घोषित हुनु एक दिन अघिसम्म लिइएको ऋण भदौ मसान्तभित्र तिर्न भनिएको छ। समितिले यसअघि पनि पटक–पटक ऋण भुक्तानीका लागि अनुरोध गर्दा पनि धेरैजसो ऋणी सम्पर्कमा नआएको भन्दै राष्ट्रिय दैनिकमा सूचना प्रकाशित गरेको हो।
समितिले तोकिएको समयभित्र ऋण नतिरेमा सावाँ, ब्याज र हर्जानासहित असुल गर्ने र आवश्यक कानुनी प्रक्रिया अघि बढाइने चेतावनी दिएको छ। ऋणीहरूलाई निर्धारित म्यादभित्र सम्पर्क गर्न र ऋण चुक्ता गर्न समितिको आग्रह छ।
