काठमाडौँ – अमेरिकाले मिलेनियम च्यालेन्ज कर्पोरेसन (एमसीसी) अन्तर्गत नेपालमा सञ्चालित कार्यक्रमलाई निरन्तरता दिने निर्णय गरेको छ।
अमेरिकी सरकारको पछिल्लो निर्णयअनुसार मिलेनियम च्यालेन्ज एकाउन्ट नेपाल विकास समिति (एमसीए नेपाल) अब निर्बाध रूपमा सञ्चालन गर्न पाइनेछ। अमेरिकी दूतावासले अघिल्लो हप्ता नेपाल सरकारलाई औपचारिक रूपमा पत्र पठाई उक्त जानकारी गराएको हो।
५० करोड अमेरिकी डलर (झन्डै ६८ अर्ब ५० करोड रुपैयाँ) को एमसीसी सम्झौतासँगै नेपाल सरकारले थप १९ करोड ७० लाख अमेरिकी डलर (लगभग २७ अर्ब रुपैयाँ) बराबरको योगदान गरेको छ। यस कार्यक्रमअन्तर्गत विद्युत् प्रसारण पूर्वाधार निर्माण र सडक सञ्जाल सुधार गरी समृद्धि हासिल गर्ने र क्षेत्रीय ऊर्जा व्यापार प्रवर्द्धन गर्ने लक्ष्य लिएको छ।
अमेरिकी वैदेशिक सहायता कार्यक्रमहरूमाथि लगाइएको स्थगनका बीचमा एमसीए नेपाललाई विशेष छुट दिइएको थियो। गएको असार १९ गते एमसीए नेपालले अमेरिकी निर्णयको स्वागत गर्दै कार्यान्वयनलाई निरन्तरता दिन अनुमति पाएको जनाएको थियो।
२०७४ सालको भदौमा नेपाल सरकार र एमसीसीबीच सम्झौता भएपछि २०८० भदौदेखि कार्यक्रमको कार्यान्वयन सुरु भएको हो। हाल एमसीए नेपाल अन्तर्गत बुटवल–गोरखपुर ४ सय केभी क्षमताको १८ किलोमिटर लम्बाइको प्रसारण लाइनसहित नयाँ बुटवल, दमौली र रातामाटेमा ४ सय केभीका सबस्टेसन निर्माण भइरहेको छ।
यो निर्णयसँगै नेपालमा एमसीसी परियोजना अब अवरोधविना अघि बढ्न सक्ने वातावरण बनेको एमसीए नेपालले जनाएको छ।
