काठमाडौं । लुम्बिनी प्रदेशका मुख्यमन्त्री चेतनारायण आचार्यले प्रदेशभर सम्भावित भारी वर्षा तथा त्यसबाट उत्पन्न हुन सक्ने प्राकृतिक विपद्को जोखिमप्रति गम्भीर रहन प्रदेशवासीलाई सतर्कता अपनाउन आग्रह गर्नुभएको छ।
जल तथा मौसम विज्ञान विभागले आगामी दिनहरूमा लुम्बिनी प्रदेशसहित देशका विभिन्न भागहरूमा भारी वर्षाको सम्भावना रहेको भन्दै चेतावनी जारी गरेपछि मुख्यमन्त्री आचार्यले बिहीबार सन्देश जारी गर्दै जनस्तरमा सचेतना र तयारी आवश्यक भएको बताउनुभएको हो।
उहाँले प्रदेशका पहाडी तथा हिमाली जिल्लाहरूमा पहिरोको जोखिम उच्च रहेको उल्लेख गर्नुभयो भने तराईका भू–भागमा डुबान, कटान र जल–थलको सम्भावना औँल्याउनुभयो। यस्तो अवस्थामा जनधनको क्षति न्यून पार्न सुरक्षा निकायहरू उच्च सतर्कतासाथ तयारी अवस्थामा रहेको जानकारी दिनुभयो।
मुख्यमन्त्री आचार्यले विपद् व्यवस्थापनमा सरकारी संयन्त्रसँगै स्थानीय तह, समाजसेवी संस्था, सञ्चारमाध्यम र आम नागरिकहरूको भूमिकालाई पनि महत्वपूर्ण बताउँदै सामूहिक प्रयासको खाँचो औँल्याउनुभयो।
“विपद् प्रतिकार्यमा सबैले आ–आफ्नो ठाउँबाट सक्रिय भूमिका निर्वाह गर्नु जरुरी छ,” सन्देशमा उल्लेख छ, “जोखिमयुक्त क्षेत्रमा अनावश्यक आवतजावत नगर्नु, विशेषगरी रातिको समयमा सवारी साधन नचलाउनु र आकस्मिक अवस्थामा सम्बन्धित निकायलाई तुरुन्त जानकारी दिनु नै सुरक्षित उपाय हो।”
उहाँले संयमित व्यवहार, सूचनाको सही प्रयोग र समुदायस्तरको सहकार्यमार्फत सम्भावित क्षति न्यूनीकरण गर्न सकिनेमा विश्वास व्यक्त गर्दै सबै नागरिकलाई धैर्य र सतर्कता अपनाउन आग्रह गर्नुभएको छ।
