काठमाडौं । चाडबाडकोे समयामा गएको बाढी पहिरोका कारण अलपत्र परेका यात्रुलाई गन्तब्यमा लैजान इलाममा निःशुल्क यातायत सेवा सञ्चालन गरिएको छ ।
इलामको सूर्योदय नगरपालिकाले हिजोदेखि इलामको माईखोलादेखि फिक्कलसम्म अलपत्र यात्रु ओर्सानका लागि निःशुल्क बस सेवा सञ्चालन गरेको थियो । नगरले करफोक बिद्या मन्दिर माध्यमिक बिद्यालयको बस निःशुल्क सञ्चालन गरेको नगर प्रमुख रणबहादुर राईले जानकारी दिनुभयो ।
सूर्योदयले निःशुल्क बस सेवा सञ्चालन थालेसँगै जिल्ला प्रशासन कार्यालय इलाममा बिपत ब्यवस्थापन समितिको बैठकले अन्य स्थानमा पनि निःशुल्क यातायात सञ्चालन गर्ने निर्णय गरेको थियो । जसअनुसार इलाम नगरपालिकाले इलाम बजारदेखि माईखोला ९राजदुवाली० माथिसम्म निःशुल्क यातायत सेवा सञ्चालन गरेको छ ।
यस्तै, पुर्वेली यातायात सेवाले इलाम माईखोला मार्गमा अस्थायी रूपमा निःशुल्क यातायात सेवा सञ्चालन गरेको छ । सडक सहज रुपमा सञ्चालन नहुन्जेल निःशुल्क यातायात सेवा सञ्चालन गरिने पुर्वेली यातायात सेवाले जानकारी दिएको छ । यस्तै इलामका समाजसेवी रतन अग्रवालले समेत निःशुल्क रुपमा यात्रु ओर्सानका लागि एउटा सवारी उपलब्ध गराउनु भएको छ ।
जिल्ला प्रशासन कार्यालयले प्याब्सन लगायतलाई यातायतका साधन उपलब्ध गराउन अनुरोध गरेको थियो । प्रमुख जिल्ला अधिकारी सुनिता नेपालले पर्यटक र यात्रुलाई गन्तब्यसम्म लैजानका लागि निःशुल्क यातायत सञ्चालन गरिएको जानकारी दिनुभयो ।
इलामको जोरकलशदेखि माईखोलासम्म यातायात सञ्चालन भइरहेको छ । माईखोला माथिपट्टि मेची राजमार्ग पहिरोले बगाएको छ । पहिरोसँगै सडकमा लेदो बगिरहेका कारण पुसमा पूर्ण सुधार आएपछि मात्र मर्मत गर्न सकिने इलामका सहयाक प्रमुख जिल्ला अधिकारी भोलानाथ गुरागाईले जानकारी दिनुभयो । माईखोलासम्म पुगेका यात्रु १५ मिनेट हिडेर अर्को सवारीमा इलाम पुग्न सक्ने उहाँले जानकारी दिनुभयो ।
इलामदेखि नेपालटारसम्मको सडक सफा गर्ने र पहिरो पन्छाउने काम भइरहेको छ । आज साँझसम्ममा उक्त सडक सूचारु गरी पाँचथरसम्म यातायात सञ्चालन गरिने सहायक प्रजिअ गुरागाईले जानकारी दिनुभयो ।
यसैबिच इलाममा अलपत्र परेका यात्रु र पर्यटकलाई होटल ब्यवसायी संघ इलामले निःशुल्क खाने बस्ने ब्यवस्था गर्ने भएको छ । संघका अध्यक्ष देवी पौडेलले बेखर्ची, बिपन्न र अस्पताल आएकाहरुका लागि संघले निःशुल्क बसोबासको ब्यवस्था गरिने जानकारी दिनुभयो । गोरखापत्र
