काठमाडौं, कात्तिक ५
दशैँको समयमा दुर्गा देवीको मूर्ति विसर्जनका क्रममा उत्पन्न तनावपछि बाँकेको पाँच स्थानमा जारी गरिएको निषेधाज्ञा जिल्ला प्रशासन कार्यालयले १५ दिनपछि हटाएको छ।
जिल्ला प्रशासन कार्यालय बाँकेले एक सूचना जारी गर्दै असोज १८ गते साँझ ७ बजेबाट लागू गरिएको निषेधाज्ञा हटाइएको जानकारी दिएको हो। सोही सूचनामा असोज २८ गते फेरि जारी गरिएको निषेधाज्ञा पनि रद्द गरिएको उल्लेख गरिएको छ।
प्रमुख जिल्ला अधिकारी धर्मराज जोशीद्वारा हस्ताक्षरित सूचनामा हाल जिल्लाको शान्ति सुरक्षा अवस्था सामान्य बन्दै गएको जनाउँदै हिन्दू धर्मावलम्बीहरूको प्रमुख पर्व दीपावली (तिहार) उल्लासपूर्वक मनाउन सहज वातावरण बनाउने उद्देश्यले निषेधाज्ञा हटाइएको उल्लेख छ।
यसअघि, मूर्ति विसर्जनको जुलुसका क्रममा दुई समुदायबीच भएको विवादले स्थिति तनावग्रस्त बनेपछि प्रशासनले डुडुवा गाउँपालिका–६, नेपालगन्ज उपमहानगरपालिका–१४, १५ अन्तर्गतको सुइया पिप्रहवा, वडा २३ अन्तर्गतको भजिपुरवा, जंगलिपुरवा, लोहरनपुरवा, तथा नरैनापुर गाउँपालिका–५ मा निषेधाज्ञा लागू गरेको थियो। ती क्षेत्रमा तोडफोड, कुटपिट र आगजनीजस्ता घटनाहरू भएको जनाइएको थियो।
निषेधाज्ञा हटाइएपछि दीपावली र तिहार शान्तिपूर्वक मनाउने वातावरण बनेको भन्दै नरैनापुर–५ मटैयाका स्थानीय बिनय दीक्षितले खुसी व्यक्त गर्नुभयो। उहाँले सबै समुदायलाई चाडपर्व शान्ति, सद्भाव र मेलमिलापका साथ मनाउन आह्वान गर्नुभयो।
