काठमाडौँ, कात्तिक ५
मोरङको जहदा गाउँपालिका–४ रामचोकमा जारी रहेको प्रथम जहदा महोत्सव झडपपछि स्थानीय प्रशासनले स्थगित गरेको छ।
बुधबार राति करिब १ बजे महोत्सवका आयोजकहरूबीच विवाद हुँदै कुटाकुट भएपछि यो निर्णय लिइएको हो। कटहरी–४ निवासी ३५ वर्षीय अनिलकुमार सहनी गम्भीर घाइते भएपछि जिल्ला प्रशासन कार्यालय मोरङले आजबाट मेला बन्द गर्ने निर्णय गरेको हो।
घाइते सहनीको टाउकोमा गहिरो चोट लागेको र हाल कोशी अस्पताल विराटनगरमा उपचार भइरहेको जानकारी अस्पताल स्रोतले दिएको छ।
यसअघि पनि लेटाङ महोत्सवमा जुवाजन्य खेल र मदिरा विक्रीका कारण झडप हुँदा मेला बन्द गर्नु परेको थियो। त्यसको अनुभवका आधारमा सुरक्षा निकायले जहदामा पनि मेला नगर्न सिफारिस गरे पनि गाउँपालिका अध्यक्ष जितेन्द्रप्रसाद साह र प्रमुख प्रशासकीय अधिकृतको पत्रका आधारमा प्रमुख जिल्ला अधिकारी इन्द्रदेव यादवले स्वीकृति दिएका थिए।
तर प्रमुख जिल्ला अधिकारी यादवले स्वीकृति दवावमा दिएको भन्ने आरोप अस्वीकार गर्दै, “महोत्सवमा सहभागीहरूको स्वास्थ्य बीमा गरिएकाले मात्र अनुमति दिइएको” प्रतिक्रिया दिनुभयो।
प्रहरी प्रमुख एसपी कवित कटवालका अनुसार मङ्गलबार मेला सकिएपछि आयोजकले मदिरा सेवन गर्दा विवाद भई झडप भएको हो। सुरक्षाकर्मीहरूले रोक्न खोजे पनि स्थिति नियन्त्रणमा आउन नसकेको उहाँले बताउनुभयो।
