काठमाडौं । नेपाली बजारमा मङ्गलबार सुन र चाँदीको मूल्य एकैदिन उल्लेख्य बढेको छ। नेपाल सुनचाँदी व्यवसायी महासङ्घले तोकेको मूल्य अनुसार सुन प्रतितोला दुई लाख ४६ हजार चार सय रुपैयाँ पुगेको छ, जुन अघिल्लो दिनको दुई लाख ४१ हजार पाँच सय रुपैयाँभन्दा करिब चार हजार नौ सय रुपैयाँ बढी हो।
त्यस्तै, चाँदीको मूल्य पनि प्रतितोला १०५ रुपैयाँले बढेर तीन हजार १७० रुपैयाँ पुगेको छ। अघिल्लो दिन चाँदीको मूल्य तीन हजार ६५ रुपैयाँ थियो। अन्तर्राष्ट्रिय बजारमा सुनचाँदीको मूल्य उच्च दरमा बढेसँगै नेपाली बजारमा पनि यसको प्रभाव परेको नेपाल सुनचाँदी व्यवसायी महासङ्घले जनाएको छ।
