काठमाडौं । गोरखाको पहाडी भूभाग बारपाक सुलीकोट गाउँपालिका – १ बारपाकमा आजकल किबीको मिठासले सजिएको छ । दरौदी नदीको हावाले चुम्बन गरेको पहाड मनासलुको छायाँमा रमाएको खेतबारी र किसानका ओढारभित्र बस्ने सपना सबै आज किबीको बोटसँगै हरियाली भएर उम्रिएका छन् । पहाडको कठोर ढुङ्गा जस्तो कठिन जीवन बुट्यान फाँड्दै अघि बढेका यहाँका किसानहरु अहिले उत्कृष्ट उत्पादनले उज्यालो भविष्यको सम्भावना देखिरहेका छन् ।
यसवर्ष बारपाकका किसानहरुले करिब ४० लाख रुपियाँ बराबरको किबी बिक्री गर्न सफल भएका छन् । बारपाकका किसानहरुले १ किलोलाई ३ सय ५० रुपियाँमा बेच्दै आएका छन् भने बारपाकमा मात्र ए ग्रेडको किबी ८० क्विन्टल ३५० रुपियाँको दरले २० जना किसानले २८ लाख रुपियाँमा बिक्री गरिएको किबी व्यवसायी चन्द्रबहादुर घलेले बताउनुभयो ।
त्यस्तै बी ग्रेडको किबीलाई १ केजीको २ सय ५० रुपियाँ बिक्री गर्ने गरिएकाले अहिले बारपाकबाट झण्डै ५० क्विन्टल बी ग्रेडको किबीबाट १२ लाख ५० हजार रुपियाँ बराबरको किबी बिक्री गर्न सफल भएको किबी कृषक घलेको भनाइ छ । किसानहरुले परिश्रमका दानालाई गहिरो मिहिनेतले सिँचाइ गर्दा किबी बगानले जीवनमा नयाँ हरियो अध्याय लेखिदिएको किसानहरुको अनुभूति छ । किबीका परिपक्व बोटहरुमा फलामका गुणझैं झुण्डिएका फलहरुले गर्दा अहिले किसानहरुले गर्व गरिरहेका छन् ।
बारपाक सुलिकोट गाउँपालिकाले बारपाकमा २०७६ सालमा किबीका बिरुवाहरु निःशुल्क रुपमा वितरण गर्दा शङ्का र जिज्ञासाको विषय बनेको थियो । तर समयले प्रमाणित गरिदियो । बारपाकको माटो, हावापानी र मेहनतले किबीलाई पकेट क्षेत्रको रुपमा चिनायो । बारपाक किबीको नमुना क्षेत्र बन्दै गएको छ, नमुना कृषक चन्द्रबहादुर घलेले भन्नुभयो, ‘‘जौविक खेती र प्राकृतिक स्वाद पहिलो रोजाइ भएकाले काठमाडौँ, पोखरा र बुटबलका व्यापारीहरु किबी किन्न बारपाक आइपुगेको उहाँले बताउनुभयो ।’’
अहिले बारपाक किसानहरु किबी खेती विस्तार गर्दै जाने योजना किसानहरुको छ । बारपाकमा पालिकाले तालिम, प्राविधिक सहयोग, निःशुल्क किबीका बिरुवा, बजार पहुँचका कार्यक्रम गरी कृषकलाई सहयोग गर्दै आएकाले किबी कृषकलाई सहज भएको गाउँपालिकाका अध्यक्ष विष्णु भट्टको भनाइ छ ।
बारपाकका किसानहरुको यो उपलब्धिले पहाडमा बसेर पनि विश्व बजारसम्म पुग्न सकिने प्रमाण दिएको छ । किबीको हरियो स्वादले किसानको जीवनमा हरियो उज्यालो भित्रयाएको छ । अनि बारपाकको पहाडमा फेरि एउटा नयाँ कृषिको बिहान उदाउँदैछ भन्ने पुष्टि गरेको छ । गोरखापत्र
