काठमाडौं । सुदूरपश्चिम प्रदेश सभाको बैठक कहिले बस्ने भन्ने प्रश्न अझैअनिश्चित बनेको छ। जेनजी आन्दोलनका क्रममा आगजनी हुँदा क्षतिग्रस्त भएको प्रदेश सभा भवन हाल मर्मत तथा पुनर्निर्माणको चरणमा छ। सभामुख भीमबहादुर भण्डारीका अनुसार संघीय संसद् नचलिरहेका बेला प्रदेशको भूमिका झन् महत्वपूर्ण भएकाले भवनका सबै नष्ट भएका संरचना पुनर्निर्माण गरी मङ्सिर महिनाभित्र बैठक बोलाउने लक्ष्य राखिएको छ। उहाँका अनुसार आगजनी र तोडफोडका कारण प्रदेश सभाका करिब ९० प्रतिशत संरचना नष्ट भएका छन्। मर्मत सकेर बैठक सञ्चालन गर्नु बाहेक अन्य विकल्प नरहेको उल्लेख गर्दै उहाँले बैठक बस्न अझै करिब एक महिना लाग्ने अनुमान गर्नुभयो।
पूर्ण रूपमा जलेको बैठक हल पुनर्निर्माणको प्रक्रिया विभिन्न संघ–संस्थाको सहकार्यमा अघि बढाइएको प्रदेश सभा सचिवालयले जनाएको छ। सचिव देवबहादुर बोगटीका अनुसार करिब एक करोड चार लाख रुपैयाँ लागतमा पुनर्निर्माणको तयारी भइरहेको छ। बैठक हलका उपकरणका लागि युएनडिपी र युएनएफपिएले ४३ लाख रुपैयाँ सहयोग गर्नेछन्। फलसिलिङका लागि सहरी विकासले १० लाख बराबरको लागत अनुमान गरेको छ भने बाँकी संरचना मर्मत–पुनर्निर्माणका लागि ५१ लाख रुपैयाँ आवश्यक परेको बताइएको छ।
प्रदेश सभाको पछिल्लो बैठक भदौ ५ गते बसेको थियो। तर भदौ २४ गतेको जेनजी आन्दोलनका क्रममा प्रदेश सभा भवन, प्रशासनिक भवन, विषयगत समिति, संसदीय दलका कार्यालय र सवारीसाधनमा आगजनी हुँदा ठूलो क्षति पुगेपछि बैठक अनिश्चितकालका लागि स्थगित गरिएको हो।
प्रदेश सभा सदस्य रमेश धामीका अनुसार वैकल्पिक स्थानमै भए पनि बैठक सञ्चालन गर्नुपर्ने आवश्यकता बढेको छ। भवन पुनर्निर्माण नहुँदा सरकारले ल्याउनुपर्ने कार्यक्रम, कानुनी प्रक्रिया तथा नियमित कार्य सम्पादन प्रभावित भइरहेका छन्। सदस्यहरूले प्रदेश सरकारलाई बैठक सञ्चालनमा गम्भीर ध्यान दिन आग्रह गरेका छन्।
