काठमाडौं । झुठा विवरण पेश गरी भ्रष्टाचार गरेकोे अभियोगमा लामो समयदेखि फरार रहेका एक प्रतिवादीलाई जिल्ला प्रहरी कार्यालय सप्तरीले पक्राउ गरेको छ। विशेष अदालत काठमाडौंले सजाय सुनाएपछि लुकिछिपी बसेका रुपनी गाउँपालिका–१ निवासी रामबाबु यादवलाई प्रहरीले खोजी गर्दै प्रहरीले नियन्त्रणमा लिएको हो। जिल्ला प्रहरी कार्यालयका प्रवक्ता तथा सूचना अधिकारी डम्बरबहादुर पुरीका अनुसार यादवलाई अदालतले भ्रष्टाचारसम्बन्धी कसुरमा १० हजार रुपैयाँ जरिवाना र छ महिनाको कैद सजाय निर्धारण गरेको थियो। फैसला कार्यान्वयनका क्रममा फरार रहेका उनलाई सोमबार पक्राउ गरी आवश्यक कानुनी प्रक्रियाका लागि सप्तरी जिल्ला अदालत, राजविराजमा पेश गरिएको प्रहरीले जनाएको छ। प्रवक्ता पुरीका अनुसार अदालतको आदेश कार्यान्वयनका लागि चलाइएको अभियानकै क्रममा फरार प्रतिवादी पक्राउ परेका हुन्।
