काठमाडौं । धरान उपमहानगरपालिका–८ तिनकुनेस्थित कोशी राजमार्गमा शुक्रबार बिहान भएको मोटरसाइकल दुर्घटनामा एक जनाको मृत्यु भएको छ। धरानबाट इटहरीतर्फ जाँदै थियो मोटरसाइकल (प्र १–०३–००१ प १३२४) रोड छेउमा पार्किङ गरिएको ट्रक (प्र १–०२–००१ ख ८७५७) मा पछाडिबाट ठोक्किँदा दुर्घटना भएको प्रहरीले जनाएको छ।
दुर्घटनामा मोटरसाइकल चालक र पछाडि सवार दुईै जना गम्भीर घाइते बनेका थिए। उनीहरूलाई तत्काल उद्धार गरेर बिपी कोइराला स्वास्थ्य विज्ञान प्रतिष्ठान, घोपा धरान लगिएको थियो। उपचारको क्रममा मोटरसाइकल चालक, इटहरी–४ का २५ वर्षीय मन्जिल लिम्बूको मृत्यु भएको इलाका प्रहरी कार्यालय धरानका प्रमुख, प्रहरी नायब उपरीक्षक भीषणबाबू राईले बताए। पछाडि सवार इटहरी–५ का ३२ वर्षीय अमित राईको उपचार जारी छ। घटनापछि ट्रक तथा ट्रक चालक तेह्रथुम फेदाप–२ का २७ वर्षीय गणेश भण्डारीलाई प्रहरीले नियन्त्रणमा लिएको छ। मृतक लिम्बूको शव बिपी प्रतिष्ठानको शवगृहमा राखिएको छ भने घटनाका सम्बन्धमा थप अनुसन्धान भइरहेको प्रहरीले जनाएको छ।
