काठमाडौं । आगामी फागुन २१ गते हुने प्रतिनिधिसभा निर्वाचनमा बाँके जिल्लाबाट तीन लाख ५१ हजारभन्दा बढी मतदाताले मतदान गर्ने भएका छन् । जिल्लामा मतदाताको सङ्ख्या उल्लेख्य रूपमा वृद्धि भएको जनाउँदै जिल्ला निर्वाचन कार्यालय बाँकेका प्रमुख टेकबहादुर शाहीले कुल मतदाताको सङ्ख्या तीन लाख ५१ हजार ४३९ पुगेको बताउनु भयो । उहाँले जिल्लामा हालै गरिएको छुटेका मतदाता नामावली सङ्कलनको क्रममा १७ हजार ५०५ जना नयाँ मतदाता थपिएको बताउनु भयो ।
प्रमुख शाहीका अनुसार मतदाता सङ्ख्या वृद्धि भएसँगै जिल्लामा मतदानस्थल र मतदान केन्द्रसमेत थप गरिएको छ । यसअघि १३८ मतदानस्थल रहेको बाँकेमा एउटा मतदान स्थल थपिएको छ भने ३८० मतदान केन्द्र रहेकोमा २३ मतदान केन्द्र थपेर हाल ४०३ वटा मतदान केन्द्र बनेका छन् । केही मतदान केन्द्र अपायक भएको भन्दै सार्नका लागि निवेदन समेत परेको जिल्ला निर्वाचन कार्यालय बाँकेले जनाएको छ । कोहलपुर नगरपालिकाको वडा नम्बर आठ र नौ, खजुरा गाउँपालिकाको वडा नम्बर सात तथा राप्तीसोनारी गाउँपालिकाको वडा नम्बर दुईका मतदान केन्द्र अपायक भएको जनाउँदै स्थानान्तरणका लागि निवेदन आएको प्रमुख शाहीले बताउनु भयो ।
उहाँले मतदाता नामावली सुधारका क्रममा जिल्लामा २४१ वटा निवेदन त्रुटि सच्याउन र ४६८ वटा निवेदन अद्यावधिक गर्नका लागि परेको छ । साथै, दोहोरो नाम दर्ता भएका ९९३ जनाको नाम मतदाता सूचीबाट हटाइएको निर्वाचन कार्यालयले जनाएको छ । बाँकेमा प्रतिनिधिसभाका तीन वटा निर्वाचन क्षेत्र रहेका छन् । निर्वाचन क्षेत्र नम्बर एकमा एक लाख २१ हजार ५३१, क्षेत्र नम्बर दुईमा ९८ हजार ५१२ र क्षेत्र नम्बर तीनमा एक लाख १३ हजार ८९१ मतदाता रहेको जिल्ला निर्वाचन कार्यालय बाँकेले जनाएको छ । गोरखापत्र
