काठमाडौं । इन्डोनेसियामा पहिरोका कारण मृत्यु हुनेको सङ्ख्या ३४ पुगेको उल्लेख गर्दै अझै दर्जनौं बेपत्ता रहेको अधिकारीले बुधबार जनाएका छन् । भारी वर्षाका कारण आएको पहिरोका कारण दर्जनौं घर गम्भीर रूपमा क्षतिग्रस्त बनाउनुका साथै सयौं विस्थापित भएको जनाइएको छ । मङ्गलबार साँझ ७ः३० बजेसम्म, ३४ जना पीडितको पहिचान गरिएको राष्ट्रिय प्रकोप शमन एजेन्सीका प्रवक्ता अब्दुल मुहारीले पुष्टि गर्नुभएको छ । “पहिचान गरिएका शव दाहसंस्कारका लागि पीडितका परिवारलाई छिटै हस्तान्तरण गरिने उहाँले बताउनुभएको छ । यस अघि बेपत्ता व्यक्तिको सङ्ख्या ३२ पुगेको जनाइएकोमा संशोधन गरिएको जनाउँदै स्थानीय अधिकारीले वास्तविक सङ्ख्या अझै बढी हुन सक्ने सङ्केत गरेका छन् । उद्धारकर्ताले जाभा टापुको पश्चिम बान्दुङ क्षेत्रको अस्थिर क्षेत्रमा भारी उपकरण प्रयोग गरेर खोजी गरिरहेको जनाइएको छ ।
यद्यपि खराब मौसमका कारण अर्को पहिरोको डरले तिनीहरू सावधानीपूर्वक काम गरिरहेको जनाइएको छ । स्थानीय अधिकारीका अनुसार यस प्रकोपले ५० भन्दा बढी घरलाई गम्भीर क्षति पुयाएको छ भने ६५० भन्दा बढी मानिस विस्थापित भएका छन् । पश्चिम जाभाका गभर्नर डेडी मुल्यादीले प्रभावित बासिन्दालाई स्थानान्तरण गर्ने प्रतिबद्धता व्यक्त गर्नुभएको छ । गत वर्षको अन्त्यमा सुमात्रा टापुमा गएको बाढी र पहिरोमा वनको क्षति हुँदा करिब एक हजार २०० मानिसको मृत्यु हुनुका साथै दुई लाख ४० हजार भन्दा बढी विस्थापित भएको सरकारले जनाएको छ । यस्ता प्रकोप वर्षाको मौसममा विशाल इन्डोनेसियाली द्वीप समूहमा सामान्यतया अक्टोबरदेखि मार्चसम्म बारम्बार चलिरहने बताइएको छ । गोरखापत्र
