काठमाडौं । क्षेत्र नं २ बाट नेकपा (एमाले) तर्फका उम्मेदवार तथा निवर्तमान सभामुख देवराज घिमिरेले आफ्नो चुनावी अभियान प्रविधिमैत्री बनाउन थालेका छन्। घिमिरेले मतदाताका घरदैलो भ्रमण गर्ने परम्परागत शैलीसँगै डिजिटल माध्यम पनि सक्रिय रूपमा प्रयोग गर्दै सुझाव संकलन सुरु गर्नुभएको हो। उहाँले क्युआर कोड र वेबसाइट लिङ्कमार्फत मतदाताहरूलाई आगामी कार्यकाल (२०८२–८७) का लागि बनाइने प्रतिबद्धतापत्र तयार पार्न आफ्नो विचार र सुझाव दिन आग्रह गर्नुभएको छ।
उम्मेदवार घिमिरेका अनुसार, जनताका वास्तविक समस्या र आवश्यकतालाई प्रत्यक्ष समेट्न यही प्रविधि अपनाइएको हो। स्थानीय विकास, पूर्वाधार, शिक्षा र अन्य क्षेत्रका मुद्दामा मतदातासँगको संवादलाई उहाँले आफ्नो मार्गचित्र निर्माणमा प्राथमिकता दिने बताउनुभएको छ। गत निर्वाचनमा झापा क्षेत्र नं २ बाट निर्वाचित भई सभामुखको भूमिका सफलतापूर्वक निर्वाह गर्नुभएका घिमिरे यस पटक पनि अनुभवी र प्रविधिमैत्री उम्मेदवारका रूपमा प्रस्तुत हुनुभएको छ।
