काठमाडौं । दार्चुलामा जनपद प्रहरीका एक हवल्दार मृत अवस्थामा फेला परेका छन्। जिल्ला प्रहरी कार्यालयअन्तर्गत महाकाली नगरपालिका–४ बाङ्गाबगडस्थित सामुदायिक प्रहरी बिटमा कार्यरत ३८ वर्षीय प्रहरी हवल्दार योगेन्द्र घर्ती सोमबार राति मृत फेला परेका हुन्। घटना शङ्कास्पद देखिएपछि अनुसन्धान अघि बढाइएको र सोही क्रममा दुई जनालाई पक्राउ गरिएको प्रमुख जिल्ला अधिकारी अनिल पौडेलले जानकारी दिनुभयो। मृत फेला परेका हवल्दार घर्तीको टाउको र निधारमा गहिरो चोट देखिएको छ।
महाकाली नगरपालिका–४ कै स्थायी बासिन्दा रहेका घर्तीको शव परीक्षणका लागि जिल्ला अस्पताल लगिएको छ। जिल्ला प्रहरी कार्यालयका प्रहरी नायब उपरीक्षक गौरव महतका अनुसार घटनामा संलग्न हुन सक्ने अन्य केही व्यक्तिको समेत खोजतलास जारी रहेको छ। घटनाको कारण र संलग्नता स्पष्ट गर्न थप अनुसन्धान भइरहेको प्रहरीले जनाएको छ।
