काठमाडौं । राष्ट्रिय राजनीतिमा प्रभाव पार्दै आउनुभएका सुदूरपश्चिम प्रदेशको प्रभावशाली नेता लेखराज भट्ट यस पटकको निर्वाचनमा घण्टीभन्दा पछाडि पर्नुभएको छ । नेकपा (एमाले) को उपमहासचिव समेत रहनु भएका उहाँ कैलाली क्षेत्र नम्बर ४ मा सोही पार्टीबाट चुनाव लड्नु भएको हो । आज विहान पौने ८ बजे सम्मको मत परिणामअनुसार नेता भट्ट तेस्रो स्थानमा हुनुहुन्छ ।
यस क्षेत्रबाट दुई पटक निर्वाचन जित्नु भएका उहाँले १७ हजार ३०६ मत गणना हुँदा दुई हजार ७८८ मत प्राप्त गर्नुभएको छ । पूर्व प्रधानमन्त्री एवम् नेपाली कांग्रेसका पूर्व सभापति शेरबहादुर देउवाको पछि–पछि राष्ट्रिय राजनीतिमा प्रभाव पार्दै आउनूभएका उहाँले क्षेत्र नम्बर ४ बाट पाँचौं पटक निर्वाचन लडिरहनू भएको छ । यसअघि भट्टले दुई पटक जित प्राप्त गर्नुभएको थियो । दुई पटक पराजित हुनु भएको थियो ।
यो क्षेत्रमा राष्ट्रिय स्वतन्त्र पार्टीका उम्मेदवार खेमराज कोइरालाले नौ हजार ६४ मतका साथ अग्रता लिइ रहनुभएको छ । त्यस्तै, नेपाली कांग्रेसका उम्मेदवार गोरखबहादुर विष्टले तीन हजार ४०१ मत प्राप्त गरेर पछ्याइ रहनुभएको छ । नेपाली कम्युनिष्ट पार्टीका उम्मेदवार हरिराम चौधरीले एक हजार १३८ मत प्राप्त गर्नुभएको छ । गोरखापत्र
