काठमाडौं । ताप्लेजुङमा सरकारी कार्यालयहरू बिहान ९ बजे खुले पनि सेवा प्राप्त गर्ने सेवाग्राही आएका छैनन् । सरकारको निर्णयबमोजिम सोमबारदेखि बिहान ९ बजे नै सरकारी कार्यालय खुलेका भए पनि सेवाग्राही नआएका हुन् । जिल्ला प्रशासन कार्यालयसहितका सबै सरकारी कार्यालय बिहान ९ बजे नै खुलेका र कर्मचारी पनि ९ बजे नै कार्यालयमा उपस्थित भएका छन् । कार्यालयहरू ९ बजे खुले सेवा लिनलाई सेवाग्राही नआएका सम्बन्धित कार्यालयले जनाएका छन् । प्रमुख जिल्ला अधिकारी शिवराज सेढाइँका अनुसार जिल्ला प्रशासन कार्यालयमा पनि १० बजे अघि तीनजना मात्र सेवाग्राही आएका छन् । सदा झैं १० बजेपछि मात्र कार्यालयमा सेवाग्राही आएका प्रजिअ सेढाइँले बताउनुभयो । बिहान ९ बजेदेखि नै कार्यालय खुल्ने सोमबार पहिलो दिन भएकाले सेवाग्राहीको उपस्थिति नभएको हुनसक्ने प्रजिअ सेढाइँको भनाइ छ ।
जिल्ला प्रशासनसहित सङ्घ तथा प्रदेश मातहतका अन्य कार्यालयमा पनि १० बजेभन्दा अघि सेवाग्राहीको उपस्थिति शुन्यजस्तै भएको छ । त्यस्तै, स्थानीय तहमा पनि बिहान ९ बजे नै सेवाग्राही नआएको जनाएका छन् । सदरमुकामस्थित फुङ्लिङ नगरपालिका १० बजेभन्दा अघि एकजना मात्र सेवाग्राही आउनुभएको नगरपालिकाका लेखापाल भोलानाथ सिग्देलले जानकारी दिनुभयो । यसरी बिहान ९ बजेदेखि सरकारी कार्यालय खुल्न थालेको पहिलो दिन सोमबार सेवाग्राही सेवा लिन आएका छैनन् । त्यसो त सार्वजनिक बिदाका दिनमा कुनै बेला कार्यालय खुल्दा पनि सेवाग्राही नआउने गरेको पाइएको छ । पूर्वा निर्धारित सार्वजनिक बिदाको दिन सरकारले कार्यालय खुलाई सेवा प्रवाह गर्नु भन्ने परिपत्र भएको बेला कार्यालय खुलाए पनि सेवाग्राही नआउने गरेको सम्बन्धित कार्यालयले जनाएका छन् । गोरखापत्र
