काठमाडौं । नगरलाई स्वच्छ, सफा र सुन्दर बनाउने अभियानअन्तर्गत हेटौँडा उपमहानगरपालिकाले खोला तथा नदी किनारमा सवारीसाधन धुन निषेध गरेको छ । पालिकाले सूचना जारी गर्दै आफ्नो क्षेत्रभित्र पर्ने राप्ती खोला, कर्रा खोला लगायतका अन्य जलाधार क्षेत्रमा सवारीसाधन नधुन निर्देशन दिएको हो । खोला तथा नदी प्राकृतिक सम्पदाका साथै जनस्वास्थ्यका दृष्टिले अत्यन्त संवेदनशील भएकाले यस क्षेत्रमा सवारीसाधन नधुन आग्रह गरिएको छ । पछिल्लो समय टिपर, ट्याक्टर, बस, सुमो तथा मोटरसाइकलजस्ता सवारीसाधन अनधिकृत रूपमा खोला किनारमा धुने प्रवृत्ति बढ्दै गएको जनाउँदै पालिकाले यस्तो कार्य रोक्न सूचना जारी गरेको हो । सवारीसाधन धुँदा निस्कने मोबिल, ग्रिज र डिटरजेन्टजस्ता हानिकारक पदार्थ सिधै खोलामा मिसिँदा जलप्रदूषण बढ्नुका साथै जलचर प्राणी र वातावरणमा गम्भीर असर पर्ने बताइएको छ । सूचना जारी भएको मितिदेखि लागू हुने गरी हेटौँडा उपमहानगरपालिका क्षेत्रभित्रका कुनै पनि खोला वा नदी किनारमा सवारीसाधन धुन पूर्ण रूपमा निषेध गरिएको छ ।
उल्लङ्घन गर्नेहरूलाई स्थानीय सरकार सञ्चालन ऐन, २०७४, फोहोरमैला व्यवस्थापन ऐन, २०६८ र वातावरण संरक्षण ऐन अनुसार कारबाही गरिनेछ । फोहोरमैला व्यवस्थापन ऐनअनुसार कसुरको प्रकृति हेरी पाँच हजारदेखि बीस हजार रुपैयाँसम्म जरिवाना गरिनेछ ।नियम उल्लङ्घन गर्ने सवारीसाधनलाई नगर प्रहरीले तत्काल नियन्त्रणमा लिएर कानुनी प्रक्रिया अगाडि बढाउनेसमेत जनाइएको छ । गोरखापत्र
