काठमाडौं – आईसीसी टी-२० अन्तर्राष्ट्रिय वरीयतामा नेपालले दुई स्थान सुधार गरेको छ। अन्तर्राष्ट्रिय क्रिकेट परिषद् (आईसीसी) को पछिल्लो वरीयताअनुसार नेपाल दुई स्थान माथि उक्लिँदै १४औँ स्थानमा पुगेको हो। नेपालको १८१ रेटिङ रहेको छ।
एशियाली खेलकुदअन्तर्गत आज भएको खेलमा टेस्ट राष्ट्र अफगानिस्तानलाई पराजित गरेपछि नेपालले वरीयतामा सुधार गरेको हो। अफगानिस्तान भने एक स्थान तल झर्दै १०औँ स्थानमा पुगेको छ।
अफगानिस्तानले दिएको १०३ रनको लक्ष्य नेपालले १८ ओभर २ बलमा ५ विकेट गुमाएर पूरा गरेको थियो। जितसँगै नेपालले वरीयतामा पनि सुधार गरेको हो। नेपालले समूह चरणको अन्तिम खेलमा भोलि बिहान पौने ६ बजे जापानसँग प्रतिस्पर्धा गर्नेछ।
आईसीसी टी–२० वरीयतामा भारत शीर्ष स्थानमा यथावत् छ। इङ्ग्ल्यान्ड दोस्रो र अस्ट्रेलिया तेस्रो स्थानमा छन्।
