काठमाडौं – लगातारको वर्षाका कारण नारायणगढ-मुग्लिन सडकखण्ड र पृथ्वी राजमार्गको चितवन खण्ड अझै सञ्चालनमा आउन सकेको छैन। बिहीबार साँझ ८ बजेदेखि पहिरोका कारण दुवै सडकखण्ड अवरुद्ध भएका हुन्। सडकका विभिन्न स्थानमा निरन्तर पहिरो खसिरहेका कारण सडक सञ्चालनमा ल्याउन समस्या भएको जिल्ला प्रहरी कार्यालय चितवनका प्रमुख प्रहरी उपरीक्षक रामेश्वर पौडेलले जानकारी दिए।
उनका अनुसार सडकमा रोकिएका पोखरातर्फ जाने तथा नारायणगढतर्फ आउने केही सवारीसाधनलाई शुक्रबार दिउँसो पार गराइएको छ। तर, दुवै सडकखण्डका विभिन्न स्थानमा ढुङ्गा, लेदो तथा पहिरो खस्ने क्रम नरोकिएकाले पूर्ण रूपमा सञ्चालनमा ल्याउन सकिएको छैन।
सडक अवरुद्ध भएपछि बिहीबारदेखि आएका ठूलो संख्यामा सवारीसाधन बीच बाटोमै रोकिएका छन्। पहिरो खस्ने जोखिम कायमै रहेकाले यात्रुको सुरक्षालाई मध्यनजर गर्दै स्थानीय प्रशासनले सडकमा सवारी सञ्चालनमा रोक लगाएको हो।
