काठमाडौँ – नेपाली कांग्रेसको निवर्तमान सभापति शेरबहादुर देउवा समूहको आसन्न १५औँ महाधिवेशनअन्तर्गत वडा अधिवेशनको तयारीले गति लिएको छ । यसै क्रममा पार्टीको क्रियाशील सदस्यता व्यवस्थापन समितिले वडा तहको अधिवेशनका लागि आवश्यक क्रियाशील सदस्यताको अन्तिम सूची निर्वाचन समितिलाई बुझाएको छ । क्रियाशील सदस्यता व्यवस्थापन समितिका संयोजक किरणराज पौडेलले शनिबार एक कार्यक्रमबीच निर्वाचन समितिका संयोजक एगराज पोखरेललाई सदस्यताको सूची हस्तान्तरण गर्नुभएको हो ।
हस्तान्तरण गरिएको सूचीअनुसार नेपाली कांग्रेसको १५औँ महाधिवेशनका लागि देशभर कुल ८ लाख ८९ हजार २३६ क्रियाशील सदस्य कायम भएका छन् । तीमध्ये ५ लाख ६१ हजार २६९ जनाको सदस्यता नवीकरण गरिएको छ भने २ लाख ९० हजार ४६७ नयाँ क्रियाशील सदस्य थपिएका छन् । सदस्यताको अन्तिम सूची निर्वाचन समितिलाई उपलब्ध गराइएसँगै वडा तहको अधिवेशनका लागि आवश्यक निर्वाचन प्रक्रिया अघि बढाउने बाटो खुलेको छ ।
प्राप्त जानकारीअनुसार पार्टीको १४औँ महाधिवेशन तयारी समितिका संयोजक डा. शशांक कोइरालाको निर्देशनमा यही असोज १५ गतेदेखि देशभरका वडामा अधिवेशन प्रक्रिया सुरु गर्ने कार्यतालिका रहेको छ । सोही कार्यतालिकाअनुसार वडा तहको निर्वाचन सम्पन्न गराउने जिम्मेवारी पाएको निर्वाचन समितिलाई क्रियाशील सदस्यताको सूची हस्तान्तरण गरिएको हो । अब सम्बन्धित वडामा अधिवेशनको तयारी तथा निर्वाचनसम्बन्धी प्रक्रिया अघि बढ्ने जनाइएको छ ।
यसैबीच, महाधिवेशन प्रक्रियालाई सहज बनाउन पार्टीले अनलाइन सदस्यता आवेदन प्रणालीसमेत सञ्चालनमा ल्याएको छ । इच्छुक व्यक्तिहरूले पार्टीले उपलब्ध गराएको अनलाइन प्रणालीमार्फत क्रियाशील सदस्यताका लागि आवेदन दिन सक्ने व्यवस्था गरिएको छ । सदस्यता व्यवस्थापन र अधिवेशन प्रक्रियालाई व्यवस्थित बनाउन अनलाइन प्रणाली प्रयोगमा ल्याइएको हो ।
क्रियाशील सदस्यताको सूची निर्वाचन समितिलाई हस्तान्तरण भएसँगै नेपाली कांग्रेसको १५औँ महाधिवेशनअन्तर्गत वडा तहको अधिवेशन प्रक्रिया अघि बढेको छ । वडा अधिवेशनबाट स्थानीय तहको पार्टी संरचनाका लागि प्रतिनिधि चयनलगायतका प्रक्रिया अगाडि बढ्नेछन् । पार्टीले निर्धारित कार्यतालिकाअनुसार अधिवेशनका बाँकी प्रक्रिया सञ्चालन गर्ने जनाएको छ ।
