काठमाडौँ – काठमाडौँको बुढानीलकण्ठस्थित चपलीबाट प्रहरीले २२ केजी सुन बरामद गरेको छ। प्रहरी उच्च स्रोतका अनुसार बिहीबार उपत्यका अपराध अनुसन्धान कार्यालयको टोलीले चपली क्षेत्रमा अपरेसन सञ्चालन गरी उक्त सुन बरामद गरेको हो।
सुन रहेको सूचना पाएपछि प्रहरीले मध्याह्नदेखि नै अपरेसन सुरु गरेको थियो। सुनसँग सम्बन्ध देखिएका केही व्यक्तिलाई प्रहरीले पक्राउसमेत गरेको स्रोतले जनाएको छ। यद्यपि पक्राउ परेकाहरूको पहिचान र सुनको स्रोतबारे विस्तृत विवरण सार्वजनिक गरिएको छैन।
सुन बरामदबारे थप जानकारी दिन प्रहरीले शुक्रबार दिउँसो १ बजे पत्रकार सम्मेलन आयोजना गर्ने जनाएको छ।
