काठमाडाैं – बुधबार सुनचाँदीको मूल्य घटेको छ । सुन तोलामा ५०० रुपैयाँले घटेको छ भने चाँदी प्रतितोला १० रुपैयाँले घटेको छ ।
नेपाल सुनचाँदी व्यवसायी महासंघका अनुसार आज छापावाल सुन प्रतितोला ९१ हजार ३०० रुपैयाँमा झरेको छ । यसैगरी, तेजाबी सुन प्रतितोला ९० हजार ८०० रुपैयाँमा कारोबार भइरहेको छ । यो मूल्य गत आठ महिना यताकै सस्तो हो । यस अघि पुस २६ गते सुनको मूल्य आजकै रहेको थियो ।
मंगलबार भने सुनको मूल्य महंगिएको थियो । हिजो सुन तोलामा ४०० रुपैयाँले वृद्धि भएर प्रतितोला ९१ हजार ८०० रुपैयाँमा खरिदबिक्री भएको थियो । आज चाँदीको भाउ पनि ओरालो लागेको महासंघले जनाएको छ । यस दिन चाँदी तोलामा १० रुपैयाँले घटेर प्रतितोला एक हजार १७० रुपैयाँमा किनबेच हुँदैछ । अघिल्लो कारोबार दिन भने चाँदीको भाउमा बढोत्तरी देखिएको थियो । हिजो चाँदी तोलामा पाँच रुपैयाँले महंगिएर प्रतितोला एक हजार १८० रुपैयाँ पुगेको थियो ।
