काठमाडौं । गुल्मीको रेसुङ्गा नगरपालिका वडा नम्बर – ८, खानीगाउँमा जङ्गली च्याउ खाँदा आठ जना बिरामी परेका छन् । खानीगाउँस्थित रेसुङ्गा सामुदायिक वनदेखि टिपेर ल्याएको डल्ले च्याउ जस्तो देखिने जङ्गली च्याउ खाँदा आठ जना बिरामी परेको जिल्ला प्रहरी कार्यालय गुल्मीका प्रहरी निरीक्षक रामकुमार केसीले जानकारी दिनुभयो ।
प्रहरी निरीक्षक केसीका अनुसार यहाँका ६५ वर्षीय टोपबहादुर थापाका जेठो ज्वाइँ ओसन काउछाले टिपेर ल्याएको उक्त जङ्गली च्याउ आइतबार राती करिब ९ बजेको समयमा पकाएर खाँदा बोमिट गरी सो सङ्ख्यामा बिरामी परेका हुन् । ६५ वर्षीय टोमबहादुर थापा, ६२ वर्षीया दिलकुमारी श्रीस, ३८ वर्षीय लक्ष्मण थापा, २९ वर्षीय विकास थापा, १० वर्षीया दिपदिका थापा, १२ वर्षीया बिनिसा थापा, ४२ वर्षीय सिर्जना काउछा र ३९ वर्षीय गीता थापा जङ्गली च्याउ खाएर बिरामी पर्नुभएको उहाँले जानकारी दिनुभयो । उहाँहरु एकै परिवारको हुनुहुन्छ भने गीता थापा पाहुनाका रुपमा आउनुभएको थियो ।
जिल्ला अस्पताल तम्घास गुल्मीमा सामान्य उपचार गरेपछि थप उपचारका लागि लुम्बिनी मेडिकल कलेज प्रभास पाल्पा रिफर गरिएको जिल्ला प्रहरी कार्यालय गुल्मीले जनाएको छ । गोरखापत्र
