काठमाडौं । भारतमा जारी त्रिदेशीय अन्तर्राष्ट्रिय महिला फुटबल प्रतियोगिताअन्तर्गत नेपालले आज इरानसँग आफ्नो पहिलो खेल खेल्ने भएको छ। भारतको सिलोङस्थित जवाहरलाल नेहरू रंगशालामा हुने खेल नेपाली समयअनुसार साँझ ६ः१५ बजे सुरु हुनेछ। सावित्रा भण्डारीको कप्तानीमा रहेको नेपाली टोली विजयी सुरुआत गर्ने लक्ष्यका साथ मैदानमा उत्रिने तयारीमा छ। नेपालका लागि यो पहिलो खेल भए पनि इरानले पहिलो खेलमा घरेलु टोली भारतलाई २–० ले पराजित गरिसकेको छ। त्यसैले इरान पनि आफ्नो जितको लय कायम राख्न चाहन्छ।
नेपाल र इरानबीच पछिल्लो सामना सन् २०१९ मा भारतकै कालिङ्गा रंगशालामा भएको ‘हिरो वुमेन्स कप’मा भएको थियो, जसमा नेपाल विजयी भएको थियो। फिफा बरियतामा इरान ७०औँ स्थानमा छ भने नेपाल ८९औँ स्थानमा रहेको छ। नेपालको टोलीमा कप्तान सावित्रा भण्डारीसहित अनिता बस्नेत, अञ्जना राना मगर, एञ्जिला तुम्बापो सुब्बा, बिमला बिक, दीपा शाही, हिरा कुमारी भुजेल, मनमाया दमाई, मिना देउवा र निशा थोकर रहेका छन्। त्यस्तै, प्रीति राई, प्रतिक्षा चौधरी, पूजा राना, पूर्णिमा राई, रश्मी कुमारी घिसिङ, रेखा पौडेल, रेनुका नगरकोटे, सबिता राना मगर, सजनी थोकर, समीक्षा घिमिरे, सरस्वती हमाल, सरु लिम्बु र उषा नाथ पनि टोलीमा समावेश छन्।
