काठमाडौं । निर्वाचन आयोगले आगामी फागुन २१ गते हुने प्रतिनिधि सभा सदस्य निर्वाचन र माघ ११ गतेका लागि तय गरिएको राष्ट्रिय सभा सदस्य निर्वाचन प्रयोजनका लागि राजनीतिक दल दर्ता खुला गरेको छ।
आयोगले जारी गरेको सूचनाअनुसार प्रतिनिधि सभा निर्वाचनका लागि मङ्सिर १ देखि १० गतेसम्म र राष्ट्रिय सभा सदस्य निर्वाचनका लागि मङ्सिर १ देखि ७ गतेसम्म दल दर्ता गर्न सकिने व्यवस्था गरिएको छ। आयोगले शुक्रबार दुवै निर्वाचनसम्बन्धी छुट्टाछुट्टै सूचना सार्वजनिक गर्दै दर्ता प्रक्रियामा सहभागी हुन बोलाएको हो।
दल दर्ताका लागि निवेदन पेश गर्दा दलसम्बन्धी सम्पूर्ण विवरण, दलको नाम आयोगमा दर्ता गरिएको मिति तथा अन्य आवश्यक कागजातहरू समेत समावेश गर्न आयोगले निर्देश गरेको छ।
फागुन २० गतेबाट राष्ट्रिय सभाका एक तिहाइ सदस्यको कार्यकाल समाप्त हुँदै भएकाले रिक्त पद पूर्ति गर्न माघ ११ गते निर्वाचन सञ्चालन गरिन लागेको हो।
