काठमाडौं । बागलुङ उद्योग वाणिज्य संघको आयोजनामा भएको आठौं बागलुङ महोत्सव सम्पन्न भएको छ । मंगलबार राति महोत्सव सम्पन्न भएको घोषणा गर्दै संघका अध्यक्ष राजनकुमार शाक्यले महोत्सव सफल भएको बताउनुभयो । महोत्सवको अवसरमा झण्डै ४२ लाख बढीको टिकट बिक्री भएको संघका पदाधिकारीले प्रारम्भिक तथ्यांक दिएका छन् । पुस १६ र १८ गते भएका दुईवटा कन्सर्टको यो अंकमा हिसाब नभएको टिकट व्यवस्थापन समितिका संयोजक नविनकुमार श्रेष्ठले जानकारी दिनुभयो । संघले केही समयभित्रै महोत्सवको वास्तविक आयव्याय सार्वजनिक गर्ने कोषाध्यक्ष मनिष राजभण्डारीले बताउनुभयो ।
महोत्सवमा खुल्ला भलिबल प्रतियोगिता, लठ्ठो तान्ने खेल, लोकदोहोरी गीत प्रतियोगिता, व्यापारिक स्टल, रमाइलो मेला, मेड इन बागलुङअन्र्तगत कृषि तथा लघु घरेलु उद्यमीहरुको उत्पादन प्रदर्शनी समेत गरिएको थियो । त्यसबाहेक महोत्सवमा टिकटक प्रतियोगिता, योजना प्रस्तुतिकरण, विद्यार्थीहरु विभिन्न रचनात्मक कार्यक्रममा सहभागि थिए । महोत्सव समापनको अवसरमा बोल्दै बागलुङ नगरपालिका प्रमुख बसन्तकुमार श्रेष्ठले महोत्सवले जिल्लाको पहिचान बढाउने, पर्यटन प्रवर्धन गर्ने र स्थानीय उत्पादनलाई पनि प्रवर्धन गर्ने बताउनुभयो । ‘‘पहिलाझै महोत्सवमा आम नागरिकको चासो कम भए पनि उहाँहरुलाई उद्यमी, व्यवसायी र सबै क्षेत्रबाट जोडेर लैजान सक्नुपर्छ’’ श्रेष्ठले भन्नुभयो ।
संघले महोत्सव विशेषको रुपमा ‘समृद्विमा हातेमालो’ नामक स्मारिका पनि प्रकाशित गरेको थियो । महोत्सवमा सहयोग गर्ने सबै क्षेत्रलाई संघले सम्मानपत्र प्रदान गरेको छ । मेला सफल पार्न नेपाली सेनाले स्वास्थ्य शिविर सञ्चालन गरेको थियो । सुरक्षा व्यवस्थापनमा जिल्ला प्रहरी कार्यालयले भूमिका खेलेको थियो । महोत्सवको अवसरमा संघले सामाजिक उत्तरदायित्व कार्यक्रमअन्र्तगत नेपाल पत्रकार महासंघ बागलुङलाई १ लाख रुपियाँ र टिकट काट्ने काममा साथ दिएको मानवसेवा आश्रमलाई ५ लाख ११ हजार रुपियाँको चेक हस्तान्तरण गरेको छ । मेलामा साथ सहयोग दिने, सहआयोजक, प्रायोजक समेतलाई संघले सम्मान गरेको । गोरखापत्र
