काठमाडौं । पूर्व प्रधानमन्त्रीद्वय पुष्पकमल दाहाल ‘प्रचण्ड’ र माधवकुमार नेपाल रुकुमपश्चिम आउनुहुने भएको छ । नेपाली कम्युनिष्ट पार्टी (नेकपा) रुकुमपश्चिमले पुस २६ गतेका दिन मुसीकोट नगरपालिका –१ मा आयोजना गरेको एकता सन्देश सभालाई सम्बोधन गर्न उहाँहरु रुकुमपश्चिम आउनुहुने भएको हो । एकता सन्देश सभा बारेमा जानकारी दिन आयोजित पत्रकार सम्मेलनमा नेकपा रुकुमपश्चिमका इन्चार्ज बसन्तकुमार शर्माले पार्टीका संयोजक प्रचण्ड र सहसंयोजक माधवकुमार नेपालले सभालाई सम्बोधन गर्ने कार्यक्रम तय भएको बताउनुभयो । अन्य नेताहरुको समेत उपस्थिति हुने उहाँको भनाइ छ ।
शर्माका अनुसार बामघटक दलहरुको बृहत एकतापछि जिल्लामा पहिलो पटक हुने विशाल सभाको तयारी तीव्र रुपमा भइरहेको छ । उहाँले सभामा दस हजार बढी कार्यकर्ताहरु सहभागी हुने गरी तयारी भइरहेको बताउनुभयो । जसका लागि वडास्तरबाटै तयारी र प्रचारको काम भइरहेको उहाँको भनाइ छ । जिल्ला इन्चार्ज शर्माले बामपन्थी एकताको पक्षमा रुकुमको ऐक्यबद्धता देखाउन, पार्टीको धारण जनतामास स्पष्ट पार्न र आगामी प्रतिनिधि सभाको चुनाव लक्षित पार्टीको धारणा सार्वजनिक गर्न सभा आयोजना गरिएको बताउनुभयो । कार्यक्रममा उहाँले तत्कालीन माओवादी केन्द्रका नेता जनार्दन शर्माले आम जनता र कम्युनिष्ट आन्दोलनलाई धोका दिएर एकता प्रक्रियाबाट पन्छिएकाले रुकुम जिल्ला व्यक्तिभन्दा विचारकै पक्षमा उभिएको सन्देश प्रवाह हुने जनाउनुभयो ।
पत्रकार सम्मेलनमा उहाँले रुकुमको कम्युनिष्ट आन्दोलनलाई देश भित्र र बाहिरबाट चासो पूर्वक हेरिएको र रुकुम कम्युनिष्टकै किल्ला रहेको साबित दाबी गर्नुभयो । नेता गोपाल शर्मालाई प्रतिनिधि सभाको उम्मेदवार बनाएर कम्युनिष्ट एकताको पहिलो सन्देश दिइसकेको उहाँले बताउनुभयो । कार्यक्रममा प्रतिनिधि सभा सदस्यमा नेकपाबाट एकल रुपमा सिफारिस हुनुभएका गोपाल शर्माले विगतको विरासत जोगाउन नेकपा सफल हुने बताउनुभयो । उहाँले जिल्लाका सर्वमान्य नेता जनार्दन शर्माले पार्टी छोडेपछि विकल्पमा जानु परेको र उक्त जिम्मेवारी आफूले ग्रहण गरेको उल्लेख गर्नुभयो । गोरखापत्र
